Уводзяцца ў абарачэнне банкноты ўзору 2000 года мадыфікацыі 2011 года наміналам 5000 рублёў і 100 рублёў

Источник материала:

Прэс-служба Нацыянальнага банка паведамляе, што з мэтай узмацнення ахоўных прыкмет і ўдасканалення візуальных элементаў аховы на банкнотах Нацыянальнага банка Рэспублікі Беларусь узору 2000 года наміналам 5000 рублёў і скарачэння выдаткаў на выраб банкнотаў наміналам 100 рублёў уводзяцца ў абарачэнне банкноты ўзору 2000 года мадыфікацыі 2011 года: 25 ліпеня 2011 года — наміналам 5000 рублёў і 5 верасня 2011 года — наміналам 100 рублёў.

Выявы пярэдняга і адваротнага бакоў, колеравая гама і памер новых мадыфікаваных банкнотаў застануцца такімі ж, як і ў банкнотаў адпаведных наміналаў узору 2000 года. Але банкнот наміналам 5000 рублёў мае адрозненні: замест палімернай празрыстай ніткі з тэкстам "НБРБ" у прамым і перавернутым выглядзе ў паперу ўведзена металізаваная ахоўная нітка, што нырае, з участкамі, якія выходзяць на паверхню банкнота ў выглядзе бліскучых прамавугольнікаў, утвараючы пункцірную лінію. Пры разглядзе банкнота на прасвет ахоўная нітка мае выгляд скразной цёмнай паласы. Банкнот жа наміналам 100 рублёў не мае ў масе паперы банкнота ахоўнай ніткі.

Мадыфікаваныя банкноты з'яўляюцца законным плацежным сродкам Рэспублікі Беларусь, абавязковым да прыёму па намінальным кошце пры ўсіх відах плацяжоў без усялякіх абмежаванняў. Банкноты Нацыянальнага банка ўзору 2000 года наміналам 5000 рублёў і 100 рублёў поруч з мадыфікаванымі банкнотамі застаюцца ў абарачэнні на тэрыторыі Рэспублікі Беларусь.

Уладзіслаў КУЛЕЦКІ.