Астанкі воінаў Першай сусветнай вайны ўрачыста перапахаваны 14 жніўня ў Мінску

Источник материала:

Урачыстая цырымонія перапахавання астанкаў воінаў Першай сусветнай вайны прайшла 14 жніўня на Мінскіх брацкіх ваенных могілках 1914—1918 гадоў, перадае БЕЛТА.

На гэтых могілках пахаваны 5 тыс. воінаў, якія аддалі свае жыцці за Айчыну. "Вядомых і невядомых герояў той вайны ледзь не паглынуў зыбкі пясок гісторыі, — сказаў на цырымоніі кіраўнік Адміністрацыі Прэзідэнта Уладзімір Макей. — Адраджэнне Мінскіх брацкіх ваенных могілак — гэта не толькі сімвал духоўнага ператварэння грамадства, але і даніна ўдзячнасці тым, хто склаў галаву ў баях за родную зямлю".

Вайна прыйшла ў Беларусь восенню 1915 года. Расійска-германскі фронт расцягнуўся на 400 км. Тут прайшлі буйнейшыя бітвы, бязлітасныя і кровапралітныя. У раёне возера Нарач кайзераўскія войскі ўпершыню на Заходнім фронце прымянілі зброю масавага паражэння — удушлівыя газы.

"Створаны па рашэнні Прэзідэнта Беларусі Аляксандра Лукашэнкі мемарыял у гонар герояў і ахвяр Першай сусветнай вайны сімвалізуе аднаўленне гістарычнай справядлівасці. Ён з'яўляецца сведчаннем таго, што мы, сучасныя беларусы, — народ, які з павагай ставіцца да свайго мінулага і яго герояў, па-хрысціянску шануе памяць тых, хто загінуў пры выкананні воінскага абавязку", — падкрэсліў Уладзімір Макей.