Калі і дзе дазваляецца збор брусніц і журавін?

Источник материала:

Абласнымі выканаўчымі камітэтамі па ўзгадненні з тэрытарыяльнымі органамі Мінпрыроды вызначаны тэрміны збору журавін і брусніц падчас сёлетняга сезона.

Такім чынам, брусніцы ўжо можна збіраць на Брэстчыне (дазвол на гэта ўступіў у сілу з 12 жніўня) і на Гродзеншчыне (з 15 жніўня). Жыхары Магілёўскай вобласці змогуць на законных падставах выправіцца за гэтымі ягадамі з 19 жніўня, насельнікі Гомельскай — з 20 жніўня. Трохі больш давядзецца пачакаць ягаднікам Віцебскай і Мінскай абласцей — дазвол на збор брусніц уступіць у сілу на іх тэрыторыі адпаведна з 25 і 27 жніўня.

Затое раней за іншых змогуць выправіцца па журавіны жыхары Віцебскай вобласці — з 1 верасня. З 2 верасня да іх змогуць далучыцца насельнікі Магілёўскай вобласці, з 3 верасня — Гомельскай. На Брэстчыне ахвотныя назбіраць гэтых ягад мусяць пачакаць да 5 верасня. У лясах Міншчыны збор журавін дазваляецца з 10 верасня. Самымі апошнімі да зборшчыкаў далучацца ягаднікі ў Гродзенскай вобласці — дазвол тут уступае ў сілу з 15 верасня.

Мінпрыроды звяртае ўвагу грамадзян, што забараняецца збор брусніц з колькасцю недаспелых ягад больш за адзін працэнт ад сабранай масы, журавін — з колькасцю недаспелых ягад больш за пяць працэнтаў ад сабранай масы. За парушэнне правілаў нарыхтоўкі, збору ці закупкі, а таксама тэрмінаў і метадаў збору прадугледжаная адміністрацыйная адказнасць.

Сяргей РАСОЛЬКА.