РОЗГАЛАС

Источник материала:

Продажы гарэлкі ў студзені—ліпені выраслі на 11,6 працэнта

Паведамілі БЕЛТА ў Нацыянальным статыстычным камітэце.

Праз рознічную сетку рэалізавана алкагольных напояў і піва на Br3976,1 млрд. У абсалютным алкаголі рэалізавана 6062,6 тыс. дал алкагольных напояў і піва.

Піва вырабілі і экспартавалі больш

Піваварныя заводы краіны ў студзені—ліпені вырабілі 26 млн 900,8 тыс. дал піва, што на 20,7 працэнта больш у параўнанні з аналагічным перыядам мінулага года, паведамілі ў канцэрне "Белдзяржхарчпрам".

Выпуск гэтай прадукцыі павялічылі "Піваварні Хайнекен" у Магілёўскай вобласці (на 44,9 працэнта), "Брэсцкае піва" (на 26,4 працэнта), сталічны "Піўзавод "Аліварыя" (на 25,7 працэнта), "Лідскае піва" (на 24,6 працэнта). Асноўны вытворца піва ў Беларусі — мінскае ААТ "Крыніца" — павялічыла выраб пеннага напою на 7,3 працэнта, давёўшы паказчык да 8 млн 939 тыс. дал. Разам з тым за тыя ж сем месяцаў года выпуск піва знізілі: "Дзвінскі бровар" з Віцебска (на 76,9 працэнта), філіял "Рэчыцапіва" "Піваварняў Хайнекен" (на 22,2 працэнта) і іншыя арганізацыі.

З пачатку года піваварныя заводы краіны павялічылі экспарт піва ў 1,43 раза ў параўнанні з паказчыкам адпаведнага перыяду мінулага года. За сем месяцаў сёлета было экспартавана 3 млн 875,8 тыс. дал піва.

Сяргей РАСОЛЬКА.

Вінныя аферы

Жыхар Віцебска працуючы на фірме, якая займалася пастаўкай прадпрымальніцкім структурам віна, піва, вады, нядрэнна нажываўся на гэтых пастаўках.

Розныя аферы ён ажыццяўляў раней, яшчэ калі быў індывідуальным прадпрымальнікам. Потым стаў працаваць начальнікам падраздзялення на фірме — пастаўшчыку прадукцыі. Заходзіў у кабінет да адказнай асобы і прасіў аформіць накладныя на адпраўку прадукцыі іншаму прадпрымальніку або прыватнай фірме, якія насамрэч раней супрацоўнічалі з бізнэс-структурай. У Расіі злодзей заказаў пячатку, якой карыстаўся пры афармленні неабходных папер пры ажыццяўленні хітрых здзелак. У выніку махлярствам і крадзяжом шляхам злоўжывання службовымі паўнамоцтвамі ён зарабіў каля 82 мільёнаў рублёў.

Як паведаміла "Звяздзе" старшы памочнік пракурора Віцебскай вобласці Ірына Таўтын, махляра пазбавілі волі тэрмінам на пяць гадоў з канфіскацыяй маёмасці.

Вёз без дакументаў 16,6 тоны таматаў

Супрацоўнікі міліцыі на аўтамабільнай дарозе Мінск — Полацк недалёка ад Полацка вечарам затрымалі аўто "Даф", на якім жыхар Мінскага раёна вёз аж 16,6 тоны таматаў агульным коштам больш за 48 мільёнаў рублёў. Суправаджальных дакументаў на груз у кіроўцы не было. Склалі адміністрацыйны пратакол, а таматы канфіскавалі.

Аляксандр ПУКШАНСКІ.