МАЗ прэзентаваў прынцыпова новую мадэль — грузавік з капотнай кампаноўкай рухавіка

Источник материала:

Мінскі аўтамабільны завод учора прэзентаваў журналістам першы доследны экзэмпляр новай мадэлі грузавіка з капотнай кампаноўкай рухавіка — МАЗ-6440. Гэта мадэль была распрацавана канструктарамі і дызайнерамі прадпрыемства ўсяго толькі за год, што, як адзначыў гендырэктар МАЗа, вельмі і вельмі сціслыя тэрміны.

— Я сам ваджу машыну шмат гадоў, таму ўчора-пазаўчора сеў за руль "капотніка" і праехаў па тэрыторыі завода з прычэпам. Паверце мне, я ехаў, як у "Жыгулях" — усё мякка ідзе і салон адчуваецца, — прызнаўся Аляксандр БАРОЎСКІ, генеральны дырэктар МАЗа. — За мной такі вялікі прычэп едзе, але я гэтага не адчуў. Гэта сапраўды новы напрамак у будаўніцтве машын, я лічу, што гэта гонар для МАЗа. І наогул, МАЗ павінен здзіўляць не толькі Беларусь, але ўвесь аўтамабільны свет сваімі навінкамі. Што мы і спрабуем зрабіць.

У доследным экзэмпляры ўсталяваны рухавік Мінскага маторнага завода магутнасцю 600 конскіх сіл, які адпавядае экалагічнаму стандарту ЕЎРА-4. Даўжыня аўтапоезда (прэзентаваны сядзельны цягач быў у счэпцы з паўпрычэпам МАЗ-975830) складае 18,45 метра і такім чынам не перавышае дапушчальныя ў Рэспубліцы Беларусь габарыты. На аўтамабілі ўсталяваныя круіз-кантроль, лічбавы тахограф, электрапад'ёмнік люка кабіны, люстэркі з электракіраваннем і электрападагрэвам, кліматычная ўстаноўка з электрапрывадам засланак, сістэма курсавой устойлівасці, абаронныя рашоткі галаўных фар, кандыцыянер, сядзенні павышанай камфортнасці, халадзільнік, падсветка падножак уваходу ў кабіну, ёсць два спальныя месцы. Да канца года прэзентаваны экзэмпляр МАЗаўскага "капотніка" будзе знаходзіцца ў доследнай эксплуатацыі, а толькі пасля будзе запушчаны ў серыйную вытворчасць. Як перакананы гендырэктар МАЗа, попыт на яго будзе і ў Беларусі, і ў іншых краінах — перш за ўсё ў Расійскай Федэрацыі.

У сваю чаргу Дзмітрый КАРАТКЕВІЧ, намеснік гендырэктара МАЗа па тэхнічным развіцці, дадаў, што капотны аўтамабіль мае шэраг бясспрэчных пераваг перад безкапотнымі: гэта і эрганоміка працоўнага месца кіроўцы (больш нізкая кабіна, роўная падлога, магчымасць устаць у поўны рост), і пасіўная бяспека (бо перад кіроўцам знаходзіцца 1,5 метра "жалеза" ў якасці бар'ера), і іншыя інавацыйныя рэчы, якія былі закладзены ў гэты аўтамабіль.

Павел БЕРАСНЕЎ.