ХРОНІКА АПОШНІХ ПАДЗЕЙ

Источник материала:

Украіна замест сродкаў МВФ можа ўзяць крэдыт у Кітаі?

МВФ незадаволены супрацоўніцтвам з Украінай, што можа прывесці да замарожвання крэдытавання краіны на нейкі час. Кіеў мае намер кампенсаваць страты за кошт кітайскай пазыкі, піша ў панядзелак "Камерсант-Украіна".

У канцы мінулага тыдня МВФ апублікавала справаздачу пра выкананне першай праграмы супрацоўніцтва з Украінай, якая была адкрыта ў лістападзе 2008 года, калі ўрад узначальвала Юлія Цімашэнка. Паводле ўмоў праграмы, на працягу 2008-2009 гадоў Украіна атрымала ад фонду тры траншы крэдытнай дапамогі на суму больш за 10,5 млрд долараў. Аднак у 2010 годзе, са зменай украінскага ўрада, праграма была датэрмінова завершана і заменена новай, якая дзейнічае дагэтуль. У рамках цяперашняй праграмы Украіна павінна атрымаць 15,15 млрд долараў. Аднак са снежня мінулага года супрацоўніцтва па гэтай праграме не ажыццяўляецца.

Фонд настойвае на павышэнні цэн на газ для насельніцтва, аднак украінскія ўлады лічаць, што тарыфы можна будзе пакінуць без змен, калі атрымаецца дамовіцца з Расіяй пра зніжэнне кантрактнага кошту на паліва. З канца кастрычніка па пачатак лістапада ў Кіеве працавала місія МВФ, аднак фонд вырашыў пасля гэтага ўзяць паўзу ў перамовах пра працяг крэдытавання. Кіраўнік украінскага ўрада Мікалай Азараў заявіў, што Украіна пражыве і без сродкаў МВФ. "Крыніца "Камерсанта" ў Нацбанку тлумачыць такую пазіцыю прэм'ера тым, што Украіна атрымала прапанову кітайскага цэнтрабанка выдаць краіне крэдыт замест сродкаў МВФ", — гаворыцца ў артыкуле выдання.

Сербы рыхтуюцца аддзяліцца ад Косава

Сербы, якія пражываюць на поўначы Косава, маюць намер абвясціць незалежнасць ад гэтай самаабвешчанай дзяржавы. Яны ўжо ўхвалілі адпаведную дэкларацыю, паведамляе ў панядзелак сербская газета "Палітыка".

Да аддзялення гатовы, прынамсі, чатыры муніцыпалітэты — Ібар-Касоўска-Мітравіца, Звечан, Зубін-паток і Лепасаіч, заявіў дзяржаўны сакратар міністэрства па справах Косава і Метохіі Олівер Іванавіч. Ён растлумачыў, што на такі крок сербаў прымусіў Еўрасаюз, які, паводле іх меркавання, занадта заўзята настойвае на хутчэйшым вызначэнні межаў Косава. Пакуль сербы "імкнуцца дэмакратычнымі і мірнымі сродкамі даваць адпор гвалтоўнай інтэграцыі іх часткі краю ў прышцінскія структуры". Аднак, калі гэта не дапаможа, аддзяленне стане "адным з магчымых варыянтаў", лічыць Іванавіч, адзначаючы, што не варта недаацэньваць становішча. "Яны (косаўскія сербы) не будуць пытаць меркавання Белграда ці прасіць у яго падтрымку", — падкрэсліў дзяржсакратар, дадаўшы, што гэты крок можа сур'ёзна дэстабілізаваць сітуацыю ў Косава і Метохіі і "стаць прычынай жорсткіх сутыкненняў не толькі на поўначы, але і ў анклавах на поўдні краю".

Зацягнуўшы паясы, іспанцы абралі "правых"

У Іспаніі падвялі вынікі парламенцкіх выбараў, якія адбыліся ў мінулую нядзелю. Паводле апошняй інфармацыі, правацэнтрысцкая "Народная партыя" атрымае 186 (44,62% галасоў) з 350 дэпутацкіх мандатаў, тады як сацыялісты, якія дагэтуль мелі большасць, атрымалі толькі 110 месцаў (28,73% галасоў).

Лідар "Народнай партыі" Марыяна Рахой неўзабаве пасля абвяшчэння вынікаў паабяцаў вывесці краіну з эканамічнага крызісу. "У нас не будзе іншых ворагаў, акрамя беспрацоўя, бюджэтнага дэфіцыту, празмернага доўгу і эканамічнай стагнацыі", — заявіў ён, выступаючы з гаўбца будынка штаб-кватэры партыі. 56-гадовы палітык удакладніў, што "не чакае ніякіх цудаў" і прымае краіну ў самы цяжкі перыяд за апошнія 30 гадоў яе гісторыі.

Падчас перадвыбарнай кампаніі Рахой абяцаў прыняцце жорсткіх мер бюджэтнай эканоміі. Лідар "Народнай партыі" лічыць, што для дасягнення гэтых мэт Іспанія павінна абысціся без вонкавай фінансавай дапамогі. Заходняя прэса падкрэслівае, што, у адрозненне ад Італіі і Грэцыі, будучы іспанскі ўрад пачне ратаваць сваю эканоміку, карыстаючыся шырокай падтрымкай насельніцтва, — і гэта істотная палітычная перавага.

Сірыя спадзяецца на караблі ВМФ Расіі?

У Сірыі абвастраецца становішча ў сувязі з выступленнямі супраць рэжыму прэзідэнта Башара Асада. Улады краіны не змаглі ўзгадніць з Лігай арабскіх дзяржаў план па выхадзе з крызісу, і зараз сусветныя СМІ зноў абмяркоўваюць магчымасць міжнароднага ўмяшання.

Тым часам у ролі абаронцы Дамаска апынулася Масква, якая выступае супраць інтэрвенцыі. У Сірыі ў сувязі з гэтым сталі гучаць заявы пра тое, што выратаваць краіну могуць расійскія ваенныя караблі. Улады РФ па-ранейшаму не схільныя змяняць свайго стаўлення да сітуацыі: у панядзелак кіраўнік МЗС Сяргей Лаўроў рэзка пракаментаваў падзеі вакол Сірыі, заявіўшы, што заклік Захаду да звяржэння Асада падобны на "палітычную правакацыю ў міжнародным маштабе", паведамляюць інфармагенцтвы.