Віцебскі губернатар патрабуе павялічыць заробак да $500 да канца года

У снежні 2012 года сярэдні заробак па Віцебскай вобласці трэба давесці да $500, заявіў 2 студзеня на селектарнай нарадзе старшыня аблвыканкама Аляксандр Косінец. Пра гэта піша шаркоўшчынская раёнка "Кліч Радзімы".

Зараз, па звестках Косінца, сярэдні заробак у вобласці складае $280. 

Акрамя таго, Косінец запатрабаваў да канца года павялічыць прадукцыйнасць працы ў два разы. Старшыня аблвыканкама загадаў правесці скарачэнне штату на прадпрыемствах і арганізацыях, а таксама заявіў, што да канца года не павінна застацца стратных прадпрыемстваў.

Старшыня аблвыканкама патрабуе скараціць энэргазатраты на 10%, матэрыялаёмістасць на 5%, давесці рэнтабельнасць да 10%. Ён загадаў засноўваць новыя вытворчасці ў малых гарадах, наладзіць экспарт будаўнічых паслуг. Сярэднесутачныя прывагі буйной рагатай жывёлы павінны быць 700 грамаў, свіней – 650 грамаў, а надоі малака – 5000 кілаграмаў з адной каровы.

“На першы погляд звышнатуральных патрабаванняў не выказана. І тым не менш, сказанае павінна быць арыенцірам у далейшай рабоце кожнага прадпрыемства”, - каментуе патрабаванні Косінца рэдактар шаркоўшчынскай раёнкі Эдуард Корсак.