Ад чаго загінулі адразу два зубры?

Источник материала:

Паралізаваная і мёртвая жывёліны былі знойдзены ў Хойніцкім раёне

Два нерухомыя зубры былі знойдзены ўвечары паблізу адселенага населенага пункта Мокіш Хойніцкага раёна. Работнікі Брагінскай міжрайінспекцыі, паляўніцтвазнаўцы і прадстаўнік праваахоўных органаў, выехаўшы на месца, убачылі адну жывёлу без прыкмет жыцця, другі зубр быў жывы, аднак падняцца на ногі не мог.

Каб высветліць, паранена жывёла ці проста аслабела з-за магчымай хваробы, спецыялісты забралі яе для ветэрынарнага даследавання. Паводле інфармацыі Дзяржаўнай інспекцыі аховы жывёльнага і расліннага свету пры Прэзідэнце Рэспублікі Беларусь, гэта аказалася самка з эмбрыёнам, якую, на жаль, давялося ўсыпіць: яе траўма не пакідала шанцаў на лячэнне. У вобласці пазваночніка жывёліны зайшлі кулю калібру 9,2 міліметра (даўжынёй 26,5 міліметра), якая была выпушчаная з наразной зброі. Узрост гэтай самкі — каля 8 гадоў. Ад чаго загінула другая самка, спецыялісты яшчэ высвятляюць. Пакуль жа ўстаноўлена, што знойдзенай жывёле — 12-14 гадоў. Агульная вага зуброў — 700 кілаграмаў. Праваахоўныя органы праводзяць расследаванне.

Коратка нагадаем, што зубр унесены ў Чырвоную кнігу Рэспублікі Беларусь, паляванне на яго забаронена. Шкода прыродзе, нанесеная незаконнай здабычай гэтай жывёлы, павялічваецца ўтрая. Акрамя таго, ненароджаны звер прыраўноўваецца да незаконна здабытай дарослай асобіны. Такім чынам, можна падлічыць, што шкода ад незаконнай здабычы самкі і яе эмбрыёна складзе каля 20 мільёнаў рублёў.

Сяргей РАСОЛЬКА.