Школьнік з г.п. Хоцімск напісаў ліст Дар'е Домрачавай і перамог у конкурсе "Белпошты"

Футбол, бокс, хакей і іншыя віды спорту мы глядзім разам з бацькам. А вось калі ў праграме значыцца біятлон, ды яшчэ і жаночая гонка з удзелам Дар’і Домрачавай, то тут ужо да нас абавязкова далучаецца маці. Біятлон — гэта самы любімы від спорту ў нашай сям’і, бо вынік гонкі немагчыма прадказаць да таго моманту, пакуль не фінішуе апошні ўдзельнік. О, якая напружанасць пануе ў паветры! Колькі эмоцый выліваецца праз край!.. Тое, як хвалююцца ў нашай сям’і за цябе, Даша, цяжка перадаць словамі. Гэта трэба ўбачыць! Тата проста не можа ўтрымацца на адным месцы: ён увесь час мерае крокамі пакой, на секунду прыпыняецца і зноў працягвае свой маршрут. Маці больш уздыхае ўслых і, я падгледзеў, трымае за цябе кулачкі. А я, прызнаюся табе па сакрэце, калі страляюць твае суперніцы (асабліва немка Магдалена Нойнер), дзьму што ёсць сілы ў іх мішэнь на экране, каб змяніць палёт кулі. Хочаш вер — хочаш не, але іншы раз гэта дапамагае. Калі так здараецца, то я атрымліваю незвычайнае задавальненне ад таго, што хоць крыху дапамог табе.

Даша, уся наша сям’я ганарыцца табою, бо ты праслаўляеш нашу краіну, нашу слаўную Бацькаўшчыну. Я нават прыдумаў крычалку:

Я вельмі многа чытаю пра цябе ў інтэрнэце. Ведаю, што ты добра валодаеш англійскай мовай, любіш падарожнічаць, табе падабаецца сноўборд і сёрфінг, а яшчэ ты любіш танцы.

2012 год у Беларусі аб’яўлены Годам кнігі. Гэта значыць, што ён — твой год, бо ты многа чытаеш. Я таксама вельмі люблю чытаць кнігі на рускай і на беларускай мове, а па-англійску пакуль што чытаю толькі невялікія тэксты.

Даша, вельмі ганаруся табой, тваім патрыятызмам. Ведаю, што Расія прапаноўвала табе месца ў сваёй зборнай за добрыя вынікі, але ты адмовілася. Малайчына! Ты яшчэ раз даказала, што не ўсё ў гэтым жыцці прадаецца. Дзякую табе за твой высакародны ўчынак. Гэта — выдатны прыклад для нас, сённяшніх школьнікаў.

Маё сэрца пачынае мацней біцца, калі высока ў небе лунае наш беларускі сцяг і ўсе людзі ведаюць, што маю Радзіму прадстаўляе такая прыгожая дзяўчына. Дзякуй табе за тое, што ты выступаеш пад беларускім сцягам. Сваімі поспехамі ў спорце ты робіш тое ж, што і нашы палітыкі.

Даша, гэты сезон пачаўся для цябе вельмі ўдала. Ты ўжо шмат разоў была ў ліку прызёраў. А нам усім вельмі прыемна бачыць чароўную ўсмешку на тваім твары. Спартыўны касцюм зялёнага колеру ўсё часцей трапляе ў аб’ектывы відэакамер. Ты прыносіш усім беларусам безліч станоўчых эмоцый.

Вельмі чакаю 2014 год, калі пачнуцца зімовыя Алімпійскія гульні. У цябе ёсць вопыт выступленняў і бронзавы медаль з Ванкувера. Я ўпэўнены, што ў Сочы ты яго памяняеш на залаты.

Алімпійскія гульні з’яўляюцца буйной спартыўнай падзеяй, у якой тысячы спартсменаў з усяго свету спаборнічаюць у розных відах спорту. Нездарма сімвалам Алімпіяды з’яўляюцца пяць кольцаў як пяць кантынентаў. Падчас правядзення Алімпіяды ўсе людзі становяцца бліжэй адзін да аднаго. Мэта Алімпійскіх гульняў у тым, каб садзейнічаць умацаванню міру ва ўсім свеце. Думаю, што гэта мэта сугучная з палітыкай нашай дзяржавы. Беларусь ніколі не шукала “лёгкага хлеба” на чужой тэрыторыі. Наш народ заўсёды дасягаў сваёй мэты сумленнай працай. Таму, Даша, я лічу цябе сапраўднай беларускай. Ведаю, што ты таксама чакаеш стартаў на Алімпіядзе-2014 у Сочы. Няхай у цябе ўсё атрымаецца. Ад шчырага сэрца жадаю табе, усёй камандзе, трэнеру Клаусу Зіберту моцнага здароўя і новых поспехаў. Ведай, Даша, мы за цябе вельмі хвалюемся і ганарымся табою.

Гэта пісьмо я пішу на зімовых канікулах. Таму хачу павіншаваць цябе з Новым годам. А падарунак ты зрабіла сабе сама, калі ў другі раз стала лепшай спартсменкай Беларусі. Віншую!

Ты — выдатная спартсменка, проста добры чалавек. Я шмат чытаў пра тое, што ты наведваеш дамы дзіцяці, не пакідаеш дзетак без падарункаў.

Я ганаруся тым, што Беларусь прадстаўляе Даша Домрачава!

Канешне, вельмі хацелася б атрымаць адказ на мой ліст. Але зараз зіма, у цябе шмат працы, я разумею. Буду чакаць лета.
Хуткага бегу і трапнай стральбы! Поспехаў!