Адаптацыя завяршылася

Источник материала:

Першакласнікі адказваюць, хто з іх больш за ўсіх любіць хадзіць у школу. Ксюша Барэйка сядзіць за партай пасярэдзіне.

Першакласніцы Ксюшы Барэйка вельмі падабаецца хадзіць у школу. “РГ” працягвае расказваць пра вучаніцу 1 “Б” гімназіі №6.

– Ксюша баіцца прапусціць заняткі з-за хваробы, распавядае бабуля першакласніцы Наталля Сянько. – Таму калі толькі кашляне, то адразу патрабуе, каб грэлі ёй малако і лячылі горла. На заняткі ідзе з радасцю, нават, я сказала б, у школу як на свята. Стала нашмат больш сур'ёзнай і адказнай.

Дзяўчынка гаворыць, што ёй падабаюцца ўсе ўрокі, а настаўніца Алена Прышчэпава заўсёды здзіўляе новымі ведамі. Ксюша працягвае займацца гімнастыкай.  Паралельна з англійскай мовай стала вучыць нямецкую.

– А дапамагае ёй у гэтым мама Паліна, якая выкладае нямецкую мову ў школе, – тлумачыць бабуля. – Напачатку мы баяліся, каб Ксеня не блытала нямецкія і англійскія словы. Але ўсё ў парадку. Ды і стымул ёсць. Ксеня не першы раз сустракаецца з немцамі, разам з бацькамі ўдзельнічае ў абменах.  Нямецкія госці жылі неаднаразова ў сям'і. А яшчэ Ксюша марыць пабываць у Германіі і Англіі. І хоча прыкласці ўсе намаганні, каб мара збылася.  Так што ўсё окэй, як кажа Ксюша.

Калі Ксюша прыходзіць дадому, бабуля запісвае, як яна адказвае на пытанні. Атрымаўся такі дзённік першакласніцы:

4 верасня.

– Ці спадабалася табе ў гімназіі?

– У гімназіі спадабалася, наша настаўніца вельмі добрая, а вось урокаў пакуль няма. У нас пакуль адаптацыя!
5 верасня.

– Табе цікава ў гімназіі?

– Так, безумоўна, як і ў садку. Сёння мяне ўзнагародзілі “сонейкам”.

– А чым гімназія адрозніваецца ад садка?

– У гімназіі нельга насіцца па класе.

– Што яшчэ цікавага было ў вас?

– Прыходзіла педагог з музычнай школы, праслухоўвала нас і сказала, што ў мяне ёсць слых. Раіць мяне запісаць у музычную школу. Я, праўда, не хачу іграць на музычных інструментах, але вось спяваць люблю з дзяцінства.

– А гімнастыку ты не кінула? Будзеш наведваць трэніроўкі?

– Ну, вядома, я ж хачу быць стройнай.

6 верасня.

– А што табе больш за ўсё спадабалася ў гімназіі?

– Ты не ўяўляеш, якая добрая ў нас дырэктар. Заходзіць ўчора ў сталовую, а я есці не хацела, дык яна і кажа мне: “Ну, нічога, дзяўчынка, не душыся, калі не хочаш ёсці”.
23 верасня.

– Ты чаму дурэеш, калі прыходзіш да нас з дзядулем дадому? Напэўна, і ў школе так сябе паводзіш?

– Не, бабуля, у школе мяне хваляць. А гуляю я часам дома. Ну, трэба ж мне дзе-небудзь павесяліцца!
30 верасня.

– Ну вось прайшоў месяц тваёй вучобы. І што ты можаш сказаць? Ці даведалася нешта новае? Навучылася чаму-небудзь?

– Вучыцца мне вельмі падабаецца. Я навучылася сябе правільна паводзіць у школе. Даведалася шмат новых слоў на англійскай мове. Тут проста выдатна! Але ў нас ужо скончыўся перыяд адаптацыі, і з панядзелка пачынаецца сур'ёзная вучоба. Урокі будуць заканчвацца пазней.

Падрыхтавала Зоя ХРУЦКАЯ.

Фота Зоі ХРУЦКАЙ.