Колькі каштуе адзначыць Новы год?

Источник материала:

Некаторыя едуць адзначаць Новы год у Тайланд.

Напярэдадні Новага года, бадай, усіх людзей цікавяць адны і тыя ж пытанні: што падарыць родным і сябрам і дзе адзначыць гэтае свята?

І ў першым, і другім выпадку галоўным пунктам з’яўляецца матэрыяльны бок. Колькі грошай будзе каштаваць свята? У гэтым артыкуле паспрабуем адказаць на гэтае пытанне.

Святочны стол дома

Многія са мной пагодзяцца: які ж Новы год без тэлевізара і традыцыйных навагодніх фільмаў і перадач?

Давайце падлічым, колькі абыдзецца навагодні стол для тых, хто не ўяўляе сабе свята без “Іроніі лёсу” і звароту Прэзідэнта па тэлебачанні.

Бутэлька шампанскага – 30-40 тысяч рублёў.

Традыцыйны, ужо гатовы салат “Аліўе” можна набыць у краме за 40-50 тысяч за кілаграм.

Мандарыны, без якіх пах свята будзе ненасычаным, каштуюць 15-20 тысяч за кілаграм.

Для гурманаў 100 грамаў ікры абыдзецца ў 80-100 тысяч.

Па самых сціплых падліках стол на аднаго чалавека будзе каштаваць прыблізна 210 тысяч. Дадайце да гэтага іншыя прысмакі – і сума ўзрастае ў разы.

Вось і лічыце, колькі сяброў і родных вы гатовы прыняць у сябе за святочным сталом. І не забудзьце памножыць вышэйназваную суму на колькасць прысутных.

Новы год у рэстаране

Для тых, у каго Новы год асацыюецца з безліччу новых знаёмых, шумнай кампаніяй, песнямі, феерверкамі і весялосцю, а не з тупаннем на кухні і гатаваннем ежы, можам параіць адзначыць Новы год у рэстаранах і клубах горада Маладзечна.

Навагодні стол у рэстаранах абыдзецца прыкладна ў 300-400 тысяч з чалавека.

Калі вы ўпэўненыя, што зможаце танцаваць да раніцы, можна адзначыць Новы год у клубе. Гэта абыдзецца вам прыблізна ў 250 тысяч.

Калі танцы да ўпаду – гэта ваш канёк, то смела накіроўвайцеся ў такія ўстановы. Дарэчы, вольныя месцы яшчэ ёсць.

Аграсядзібы чакаюць вас!

Навагодні адпачынак у аграсядзібе становіцца апошнім часам вельмі папулярным. Акрамя традыцыйнага святочнага стала і віншаванняў ад Дзеда Мароза і Снягуркі вам прапануюць пачастунак на свежым паветры –  разнасолы, юшка, гарачы духмяны шашлык, марозная гарэлка і многае  іншае.

І ўсё гэта пад музыку і зухаватыя беларускія песні, гульні, конкурсы, шляхецкія забавы, катанне на конях! Абыдзецца гэта ў два мільёны рублёў.

Новы год пад пальмай

А для тых, хто вырашыў не мерзнуць і адзначаць Новы год не пад бой курантаў і стрэлы шампанскага, а пад вуркатанне акіяна і какосавае малако – вам прамая дарога ў турыстычныя агенцтвы.

Найтанней на Новы год можна злятаць у Егіпет. Паездка будзе каштаваць 350 долараў на чалавека. А самыя дарагія навагоднія курорты Гоа і Тайланд абыдуцца ў 1500-3000 долараў з пары. Дарэчы, пуцёўку ў Тайланд на навагоднія святы замовіла толькі адна сямейная пара з Маладзечна.

Дзе святкаваць Новы год, мы спадзяёмся, вам адказалі. Але не забывайцеся, што з кім сустрэнеш Новы год, з тым яго і правядзеш. Таму сустракайце Новы 2013 год толькі з роднымі, блізкімі і каханымі людзьмі!

Наталля ТУР,
школа маладога журналіста.

Фота rewalls.com