У Гродне пачалося расфармаванне самага вялікага вайсковага гарадка

Источник материала:

Ваенны гарадок Фолюш, які па памерах займае некалькі гектараў, зараз выглядае даволі пустынна. Вокны ў будынках павыбіты, альбо забіты фанерай. Па калідорах былых казармаў гуляе вецер. Аднак ён не заўсёды быў такім закінутым.



Сваю гісторыю вайсковы гарадок, які можна назваць горадам у горадзе, распачаў яшчэ ў пачатку ХХ стагоддзя, калі першыя казармы былі пабудаваныя для вайскоўцаў, што ўдзельнічалі ў абароне гарадзенскай крэпасці.

Пра гісторыю вайсковай справы на Фолюшы беларускаму Радыё Рацыя распавядае гарадзенскі гісторык Зміцер Люцік:

- У планах яшчэ 1912-13 гг. прадугледжвалася пабудова менавіта ў Фолюшы вайсковага гарадка - складоў, ангараў і таксама казармаў для гарадзенскай артылерыі. Асноўная моц гарадзенскай крэпасці была артылерыя. І колькасць гарматаў была тут вельмі значная. Планавалася пабудаваць шмат цагляных казармаў. Праўда, гэтыя планы да канца не былі рэалізаваныя. Будаўніцтва тут адбывалася толькі два будаўнічыя сезоны. Пачалася Першая сусветная вайна. Гародня была акупаваная немцамі.



У міжваенны час і пасля Другой сусветнай вайны Фолюш забудоўваецца і колькасць казармаў і ангараў павялічваецца ў некалькі разоў. Зміцер Люцік лічыць, што пустыя казармы можна выкарыстоўваць пад музейныя карпусы, а на пустынных абшарах можна было б пабудаваць супермаркеты для жыхароў горада.