У манастыры на Браслаўшчыне адкрылі трэнажорны зал

Источник материала:

У кляштары пры касцёле Найсвяцейшай Тройцы ў Друі Браслаўскага раёна з'явіўся трэнажорны зал. Спартыўны комплекс заняў цэлае крыло на першым паверсе будынку.

Фота: старонка Сяргея Сурыновіча ў Фэйсбук

Фотаздымкі незвычайнага спортзала выклаў у сваім Фэйсбуку настаяцель манастыра ксёндз Сяргей Сурыновіч.

Святыню днямі наведаў біскуп Віцебскі Алег Буткевіч, які сам любіць займацца спортам. Ён "вельмі ўзрадаваўся, што ў сценах манастыра з'явілася месца для друеўскіх маладзёнаў, моладзь будзе збірацца на гартаванне як духу, так і цела", піша Сяргей Сурыновіч.

Фота: старонка Сяргея Сурыновіча ў Фэйсбук

Побач з маладзёнамі - біскуп Віцебскі Алег Буткевіч. Фота: старонка Сяргея Сурыновіча ў Фэйсбук

Умова карыстання адна: ключы ад трэнажорнай залі ў ксяндза можна атрымаць па сканчэнні імшы, прысутнасць на ёй абавязковая. Аднак дзверы ў кляштар расчыненыя і для праваслаўных падлеткаў, паведамляе партал krynica.info. Грошы на набыццё трэнажораў выдзяліў прадпрымальнік з Мінска.

Чытайце таксама:

Вартаўнікі бастыёнаў. Як жывуць і служаць каталіцкія святары ў маленькіх вясковых прыходах? >>>