Сям’я з Кіраўшчыны — самая спартыўная ў краіне!

У Брэсце прайшоў рэспубліканскі сямейны фестываль здаровага ладу жыцця “Мама, тата, я — здаровая сям’я”. Да ўдзелу ў ім было запрошана больш за 40 сем’яў у розных узроставых групах (дзеці) з рэгіёнаў Беларусі і горада Мінска, якія паказалі лепшыя рэзультаты па выніках абласных спаборніцтваў.

Нагадаем, што на этапе, які праходзіў у Магілёве, перамогу заваявала сямейная каманда Пішчаліных з Мышкавіч, у саставе бацькоў Яўгена і Вольгі і іх сыноў — 10-гадовага Мікіты і 5-гадовага Яраслава, якім і было даручана ў ліку іншых абараняць гонар Прыдняпроўскага краю.

Тое, што гэтая сям’я па-сапраўднаму спартыўная, ужо не раз было даказана на разнастайных спаборніцтвах. Самі бацькі прымаюць актыўны ўдзел у спартыўным жыцці ААТ “Рассвет імя К.П.Арлоўскага”, дзе працуюць, а таксама нашага раёна, і, як бачым, выходзяць на рэспубліканскі ўзровень. Да здаровага ладу жыцця прывучаюць і сваіх дзяцей. У сямейным архіве сабралася цэлая калекцыя ўзнагарод.

І зноў Пішчаліны прадэманстравалі выдатныя рэзультаты, бліскучую спартыўную форму і дабіліся высокіх месцаў практычна ва ўсіх дзевяці відах праграмы. Яўген стаў пераможцам у падцягванні на перакладзіне і дартсе. Вольга — другой у згібанні і разгібанні рук ва ўпоры лежачы. Абодва ўвайшлі ў тройку лепшых у стральбе з пнеўматычнай вінтоўкі. Мікіта і Яраслаў занялі прызавыя месцы ў чаўночным бегу, кіданні мяча. А ўсе разам занялі другое месца ў сямейнай эстафеце.

Як вынік удалых выступленняў па суме ўсіх рэзультатаў — першае месца! А наогул каманда Магілёўскай вобласці паказала другі рэзультат. Так што сям’я з Мышкавіч, разам з выдатным настроем і пазітывам ад цікавых захапляльных спаборніцтваў прывезла дадому чарговыя ганаровыя трафеі — кубак, медалі і дыпломы. Так трымаць!

Аляксандр ХАХЛОЎ.