В конкурсе «Многодетная семья — 2019» поборолись 7 «фамилий». Кто стал лучшим?

Источник материала:

За шчаслівую сям’ю і надзейную будучыню

Першы этап рэспубліканскага конкурсу “Сям’я года” “Шматдзетная сям’я-2019” сабраў у аўторак самую рознаўзроставую аўдыторыю: былі і аднагадовыя малышы, і людзі, чый узрост інакш як паважаным не назавеш. Арганізатарамі конкурсу выступілі раённы цэнтр сацыяльнага абслугоўвання насельніцтва і МПЦ “Равеснік”, а пазмагацца за званне лепшых вырашылі 7 “фамілій” — сур’ёзная канкурэнцыя!

У “візітоўцы” сем’і прадстаўлялі гісторыю свайго роду, сямейныя звычаі і традыцыі. Другое конкурснае заданне “Мая краіна — мая сям’я” ўключала прэзентацыю актыўнай жыццёвай пазіцыі канкурсантаў. Пра кожнага з удзельнікаў гледачы, якія аказвалі адчувальную падтрымку плакатамі і цёплымі апладысментамі, маглі даведацца нямала цікавага. Напрыклад, у сям’і Бабіна з Асіповічаў большасць жанчын была менавіта шматдзетнымі матулямі; Бокшыцы маюць сямейным заняткам пчалярства; сям’я Буракоў з Ялізава валодае чароўнай скрынкай, дзе захоўваюцца гістарычна важныя для яе рэчы; Долавы з райцэнтра маюць свой гімн і сцяну гонару дома; Кульчынскія з Ліпеня стварылі сямейнае дрэва, на якім размешчаны фотаздымкі продкаў; асіпаўчане Мельнічэнкі галоўным у жыцці лічаць узаемадапамогу і павагу да старэйшага пакалення; а Палуды дакладна ведаюць усе шматлікія складальнікі сямейнага шчасця.

Няпростая задача стаяла перад журы, якое ўзначаліла начальнік аддзела ідэалагічнай работы, культуры і па справах моладзі райвыканкама Ірына Раманчук: усе выступленні былі па-свойму цікавымі, крэатыўнымі, шчырымі. Адчувалася і грунтоўная падрыхтоўка сямей да выхаду на сцэну. У выніку самымі дружнымі прызнаны Бабіны, творчымі — Палуды, арыгінальнымі — Кульчынскія, а Буракі атрымалі дыплом за патрыятычнасць. Трэцяе месца занялі Мельнічэнкі, Бокшыцы ўзнагароджаны Дыпломам ІІ ступені, а на вышэйшую прыступку п’едэсталу гонару ўзняліся Долавы, якія і будуць прадстаўляць раён на абласным конкурсе.

Ірына Раманчук, падводзячы вынікі прыемнай па ўсіх параметрах сустрэчы, падкрэсліла важнасць захавання сямейных традыцый і каштоўнасцей, умацавання духоўна-маральных асноў ячэйкі грамадства. Будзе моцнай сям’я — будзе моцнай дзяржава. І з гэтым нельга не пагадзіцца.

Кожная з сямей-удзельніц атрымала і грашовыя прызы: фінансаванне конкурсу ажыццяўлялася ў рамках рэалізацыі ў раёне падпраграмы “Сям’я і дзяцінства” Дзяржаўнай праграмы “Здароўе народа і дэмаграфічная бяспека Рэспублікі Беларусь” на 2016-2020 гады. Запомнілася мерапрыемства таксама канцэртнымі нумарамі, якія падрыхтавалі спецыяльна з гэтай нагоды маладзёжна-падлеткавы цэнтр, абедзве гарадскія дзіцячыя школы мастацтваў і школа танца “Фарт”. Запамінальна яркім і прыгожым было і святочнае аздабленне сцэны.

— Зацікавілася конкурсам, калі ён праходзіў яшчэ ў мінулы раз. Падумала, што і мы са сваімі дзеткамі маглі б паўдзельнічаць, — падзялілася матуля Алеся Долава. — Таму, калі ў СШ № 2, дзе вучацца Ангеліна, Карына і Руслан, прапанавалі выступіць, без сумнення згадзіліся. Усё спадабалася, было цікава пазнаёміцца з іншымі сем’ямі, пераняць іх вопыт і падзяліцца сваім. Толькі вось наша Яраслава, якой паўтара годзіка, не вытрымала нагрузкі: соладка заснула ў таты Юрыя на руках прама на сцэне. А яна знатная ў нас тан—цорка! Будзем спадзявацца, што на абласным этапе, які адбудзецца ўжо ў лютым, і самая маленькая дачушка зможа паказаць свой талент. А таго пазітыву, які атрымалі ў “Равесніку”, павінна хапіць для ўдалага выступлення!

Валянціна КОРБАЛЬ.

Астатнія фота глядзіце тут або тут.