КАЛІ Ў МАГАЗІНЕ НЯМА КАСАВАГА АПАРАТА

Источник материала:

Пасля таго, як на старонках газеты быў апублікаваны матэрыял “Пратэрмінаваным таварам не месца на паліцах магазінаў” (“Бярэзінская панарама” ад 16 лютага 2011 года), у рэдакцыю паступіла некалькі тэлефанаванняў. Адпаведна з патрабаваннямі Закону “Аб абароне правоў спажыўцоў”, вяртаючы па нейкіх прычынах тавар назад у магазін, неабходна прад’явіць чэк, як доказ таго, што пакупка зроблена менавіта ў гэтай гандлёвай кропцы. Аднак не ў кожным магазіне ёсць касавы апарат. А без яго чэк атрымаць немагчыма. Праўда, закон прадугледжвае яшчэ і паказанні сведак, але разлічваць, што ў час пакупкі хтосьці будзе побач, таксама не даводзіцца. Як быць у дадзеным выпадку? Ці не з’яўляецца адсутнасць касавых апаратаў парушэннем правілаў гандлю?

- Адпаведна з Пастановай Савета Міністраў Рэспублікі Беларусь і Нацыянальнага банка Рэспублікі Беларусь

№ 901/11 ад 8 ліпеня 2009 года ў гандлёвых аб’ектах спажывецкай кааперацыі, размешчаных у сельскай мясцовасці, дазваляецца прымаць наяўныя грашовыя сродкі без прымянення касавых падсумоўваючых апаратаў, калі тут працуе не больш за тры чалавекі, – тлумачыць першы намеснік старшыні Бярэзінскага райпо Валянціна Іванаўна Барысевіч. – Таму ніякага парушэння заканадаўства ў дадзеным выпадку мы не дапускаем. Аднак, нягледзячы на такі вось дазвол, пакрыху набываем касавыя апараты і ўжо аснасцілі імі ўсе магазіны на цэнтральных сядзібах аграгарадкоў, гандлёвыя кропкі ў некаторых вёсках. Працаваць падобным чынам і прадаўцам зручней.

Што ж датычыць канкрэтна тых магазінаў, дзе пакуль яшчэ атрымаць чэк на пакупку немагчыма, то па патрабаванні пакупніка прадавец павінен выпісаць на набытыя тавары прыходны касавы ордэр, які і будзе сведчаннем вашай пакупкі. Да ўсяго, пры ўзнікненні нейкіх спрэчных пытанняў, якія датычацца тэрмінаў рэалізацыі, якасці і не толькі, любы пакупнік можа неадкладна патэлефанаваць у райпо. У кожным магазіне на дошцы аб’яў ёсць інфармацыя з указаннем замацаванага за дадзеным аб’ектам спецыяліста райпо і нумарам тэлефона. Падобная інфармацыя ёсць і ва ўсіх аўтамагазінах. Як сцвярджае В. І. Барысевіч, усялякую праблему можна вырашыць на месцы, не трацячы шмат нерваў і не губляючы час.

Ніна ФЕДАРОВІЧ.