Паведамленне прэс-службы Прэзiдэнта Рэспублiкi Беларусь

Источник материала:

Маршрут гэтай паездкi быў абраны з улiкам пажаданняў самiх прадстаўнiкоў ЕС. Паслы хацелi на свае вочы пабачыць, як выкарыстаныя грошы заходнееўрапейскiх падаткаплацельшчыкаў, выдаткаваныя на ўпарадкаванне беларускай мяжы. Нагадаю, што на дэмаркацыю нашай Дзяржаўнай гранiцы з Лiтвой ЕС выдзелiў 1 мiльён 300 тысяч еўра. I, як паведамiў падчас прэс-канферэнцыi Аляксандр Паўлоўскi, першы этап дэмаркацыi беларуска-лiтоўскай гранiцы паспяхова завершаны. На ўчастку працягласцю 483 кiламетры на грошы Еўрасаюза былi ўстаноўленыя памежныя слупы. Самi паслы таксама ўласнаручна далучылiся да гэтай справы: паблiзу пункта пропуску «Прывалка-Рэйгардас» iмi быў устаноўлены спецыяльны памятны знак з нагоды завяршэння першага этапа дэмаркацыi. А поўнасцю дэмаркацыя мяжы Беларусi з Лiтвой i Латвiяй завершыцца напрыканцы 2004 года. Зноў жа наша краiна разлiчвае на дапамогу Еўрасаюза. Як пажартаваў генерал Паўлоўскi, адпаведную памятную шыльдачку пагранiчнiкi ўжо падрыхтавалi. Цяпер слова за краiнамi ЕС.

Прынамсi, паводле слоў пасла Еўрасаюза ў Беларусi, Малдове i Украiне Норберта Жустэна, ЕС, якi за апошнiя 10 гадоў на розныя мэты выдзелiў Беларусi больш за 50 мiльёнаў еўра, не мае намеру спыняць свае праграмы. На далейшую дэмаркацыю мяжы з Лiтвой i Латвiяй Беларусь атрымае яшчэ 2 мiльёны еўра, на абсталяванне сродкамi аўтаматызацыi паветраных пунктаў пропуску сумесна з расiйскiмi калегамi нашы памежнiкi атрымаюць 4,5 мiльёна еўра, на разгортванне аўтаматызаванай сiстэмы памежнага кантролю, зноў жа разам з пагранiчнiкамi РФ, Еўрасаюзам будзе выдаткавана 11 мiльёнаў еўра.

Як адзначыў Надзвычайны i Паўнамоцны Пасол Францыi ў Беларусi Стэфан Шмялеўскi, ахова мяжы беларускiмi пагранiчнiкамi адпавядае агульнаеўрапейскiм нормам. «Я ўпэўнена магу сказаць у Парыжы, што грошы французскiх падаткаплацельшчыкаў, выдаткаваныя на ўпарадкаванне беларускай мяжы, выкарыстаныя эфектыўна», — адзначыў спадар Шмялеўскi.