Не за вочы чорныя

Источник материала:

Анталогiя беларускай песнi

Юрый Семяняка (сёння яму споўнiлася б 80 гадоў) — кампазiтар-рамантык. Шмат яго вакальных твораў увайшло ў залаты фонд беларускай музыкi. Мяккi лiрызм, выразная меладычная аснова, шчырасць выказвання ўласцiвыя песням «Ой, шумяць лясы зялёныя», «Люблю цябе, Белая Русь», «Расцвiтай, Беларусь», «Явар i калiна», «Ты мне вясною прыснiлася», «Журавiны», «Беларусачка» i iншым. Яны i сёння з нязменным поспехам выконваюцца на эстрадзе.

Кампазiтар плённа працаваў i ў сур’ёзных жанрах. Ён напiсаў музыку да опер «Калючая ружа», «Калi ападае лiсце», «Зорка Венера», «Новая зямля», аперэт «Рабiнавыя каралi», «Пяе жаваранак», «Паўлiнка», «Тыдзень вечнага кахання», да кiнафiльмаў i спектакляў, разнастайныя вакальныя i iнструментальныя творы. Юрый Семяняка актыўна звяртаўся да творчасцi i класiкаў беларускай лiтаратуры, i маладых паэтаў, стварыў музычны вобраз Максiма Багдановiча.

Мiхась ШАВЫРКIН.

Не за вочы чорныя

Словы Адама Русака

Музыка Юрыя Семянякi

Цiха растрывожыла

Думкаю-бяссоннiцай

Вечна неспакойная

Ты, любоў мая.

Не за вочы чорныя,

Не за бровы смуглыя,

А за сэрца шчырае

Палюбiла я.

Знаю, не праложаны

Мне дарогi роўныя,

Кветкамi не сцелюцца

Сцежкi у жыццi.

Пушчамi глыбокiмi,

Горамi высокiмi,

Рук не разнiмаючы,

Нам з табой iсцi.

Засвяцiся яснаю,

Светлаю нязгаснаю,

Зоркаю шчаслiваю,

Ты, любоў мая.

Не за вочы чорныя,

Не за бровы смуглыя,

А за сэрца шчырае

Палюбiла я.