Гарачы лёд сусветнага першынства

Источник материала:

Iнтрыга, хто стане пераможцам у групе «В» (дывiзiён 1) на маладзёжным чэмпiянаце свету па хакею (ён праходзiў у сталiчным Палацы спорту з 12 па 18 снежня), трымалася да апошняга дня турнiру. Асноўная барацьба вялася памiж зборнай нашай краiны i камандай Казахстана, матч памiж якiмi i завяршаў спаборнiцтвы. Калi сапернiкаў задаволiў бы i нiчыйны зыход, то падначаленым Эдуарда Занкаўца патрэбна была толькi вiкторыя.

Перад заключнай гульнёй казахстанцы мелi казырную карту: перамаглi ва ўсiх папярэднiх матчах i набралi 8 ачкоў. У беларускай «маладзёжкi» было на адно менш, бо яна хоць i не пацярпела нiводнага паражэння, але збочыла з дарогi да чэмпiёнства, калi па-таварыску разышлася з палякамi — 3:3. Праўда, затым настрой каманды ўзнялi ўпэўненыя перамогi над iтальянцамi — 7:1 i аўстрыйцамi — 6:0. Такiм чынам, лёд сусветнага першынства сапраўды напалiўся.

Варатар казахаў Сяргей Худзякоў не змог зрабiць сабе падарунак на дзень нараджэння (матч з беларусамi прыпаў якраз на яго): прапусцiў ужо ў першым перыядзе. Беларусы вялi ў лiку на працягу ўсёй сустрэчы i завяршылi яе з лiкам 5:2 на сваю карысць. Галамi вызначылiся Iрэк Хафiзаў, Раман Блох, Аляксандр Кiтараў i двойчы Сяргей Касцiцын.

На пасляматчавай прэс-канферэнцыi трэнер нашай каманды Эдуард Занкавец сказаў, што гэтая гульня стала самай доўгай у яго жыццi, i адзначыў: «Нам удалося перамагчы дзякуючы веры ў каманду i вялiкай самааддачы iгракоў».

Лепшым варатаром турнiру стаў галкiпер нашай «маладзёжкi» Дзмiтрый Мiльчакоў, якi абараняў «браму» ва ўсiх матчах, акрамя сустрэчы з палякамi (тады гуляў Iгар Брыкун). «Засвяцiлiся» i iншыя беларускiя iгракi: «першым нумарам» сярод нападаючых быў прызнаны Сяргей Касцiцын (на фота), а лепшым бамбардзiрам — Дзмiтрый Панцыраў. Лепшым абаронцам стаў iтальянец Андрэас Лутц.

Кiраўнiк дырэктарата турнiру Эрнэст Альянчыч высока ацанiў узровень правядзення чэмпiянату:

— Было вельмi прыемна правесцi тут тыдзень. Арганiзацыю назваў бы iдэальнай. Я ўжо вёў перамовы з некаторымi прадстаўнiкамi IIHF, i мы вырашылi, што адзiн з турнiраў федэрацыi будзе прадасталены Беларусi. Адзiнае патрабаванне: трэба пабудаваць сучасную спартыўную арэну з вялiкай умяшчальнасцю, бо ў мяне з’явiлася ўражанне, што не ўсе балельшчыкi змаглi трапiць на матч. У нас ужо быў непрыемны вопыт з Латвiяй, якая не пабудавала арэну ў тэрмiн. Аднак галоўнае — на сённяшнi дзень там усё падрыхтавана да чэмпiянату свету ў маi 2006 года. Беларусь жа можа прэтэндаваць як мiнiмум на юнацкi чэмпiянат U-17 у 2008 годзе. Пры гэтым няважна, якое становiшча будзе займаць ваша каманда: яна трапiць на спаборнiцтвы аўтаматычна як гаспадыня. Наяўнасць жа новай спартыўнай арэны павысiць шанцы Беларусi на атрыманне аднаго з топ-турнiраў.

P. S. Спаборнiцтвы ў групе «А» адбывалiся ў славенскiм Бледзе. Там перамагла каманда Германii.