Як процiстаяць гандлю людзьмi?

Источник материала:

Намеснiк пракурора Магiлёўскай вобласцi Франц Вайцаховiч паведамiў, што цяпер расследуецца крымiнальная справа наконт вывазу дзяцей як жывога тавару ў Iталiю.

— Гэта нiбыта пад выглядам дабрачыннай дзейнасцi, але насамрэч арганiзавана мафiёзнымi структурамi, — патлумачыў Франц Вайцаховiч. — Яны вывезлi i ўсталявалi апеку над 53 дзецьмi з Мсцiслаўскага дома-iнтэрната. Адна дзяўчынка цяпер натуральна выкрадзена, i трэба яе вярнуць. Мы высветлiлi, што апека над дзецьмi патрэбна для таго, каб не плацiць падаткi: паводле ўнутраных iтальянскiх законаў, апякун вызваляецца ад iх платы. Так што дзецi патрэбны толькi дзеля матэрыяльнай карысцi, а беларуская дзяржава нясе страты, бо наўрад цi гэтыя дзецi вернуцца на радзiму.

Аднак найбольш распаўсюджаны вываз дарослых людзей для сэксуальнай эксплуатацыi. Напрыклад, перакрыты канал, па якому дзяўчат з Магiлёўшчыны вывозiлi ў Аб’яднаныя Арабскiя Эмiраты, у горад Дубаi. У мiжнародную групоўку ўваходзiлi дзве жанчыны з Бабруйскага раёна.

Адна жанчына вербавала вясковых дзяўчат, а другая афармляла iм дакументы i садзiла ў Шарамецьеве на самалёт. У Дубаi дзяўчат сустракалi выхадцы з Украiны i развозiлi па бардэлях. У Дубаi самыя вялiкiя цэны на «жывы тавар»: за дастаўку маладой жанчыны плацяць у сярэднiм 7 тысяч долараў. Бабруйчанкi адправiлi туды пяцярых дзяўчат.

Вярбоўшчыца сёлета асуджана гомельскiм судом на 6 гадоў пазбаўлення волi нават нягледзячы на тое, што яна — iнвалiд II групы. Другая жанчына, бабруйчанка, знаходзiцца ў вышуку, i ёсць звесткi, што яна хаваецца на тэрыторыi Расii.

Сёлета ў справах, звязаных з гандлем людзьмi фiгуравалi такiя краiны, як Расiя — у асноўным, Польшча, Прыбалтыка.

— Аднак я не сказаў бы, што людзей захапiлi, скруцiлi i вывезлi ў багажнiку — такога няма, — гаворыць Франц Вайцаховiч. — У асноўным вывозяць шляхам падману. Прапануюць працаваць, напрыклад, у бары. А ў вынiку высвятляецца, што трэба займацца аказаннем сэксуальных паслуг.

Разам з тым пракуратура мае такiя факты, калi жанчыны самi з’язджаюць у Маскву займацца прастытуцыяй. Сярод iх ёсць такiя, якiя маюць дзяцей, а ёсць i школьнiцы, якiя адпраўляюцца на заробкi ў час канiкулаў.

Гэта якраз самастойныя выезды, а не вываз людзей. Вядома, што ў сувязi з гэтым з тэрыторыi Расii дэпартавана за год 1200 беларускiх жанчын.

Сёлета Магiлёўская абласная пракуратура накiравала ў суд 10 крымiнальных спраў па гандлю людзьмi. Усяго 67 злачынстваў — менавiта столькi людзей вывезена ў якасцi «жывога тавару». Злачынцы — у асноўным беларусы i двое расiян. Пакаранне за такiя злачынствы вельмi сур’ёзнае.

— Наша заканадаўства стала больш жорсткiм у дачыненнi да гандлю людзьмi, тэрмiны пазбаўлення волi вялiкiя, i таму злачынцам небяспечна i нявыгадна займацца гэтай дзейнасцю, — зазначыў намеснiк пракурора Магiлёўскай вобласцi. — Таму я б усё ж сказаў, што гандаль людзьмi мае тэндэнцыю да памяншэння.

Таксама Франц Вайцаховiч паведамiў, што ў працэсе расследавання крымiнальнай справы высветлiлася, што група дзяцей з Магiлёўшчыны была вывезена на Блiзкi Усход. Цяпер лёс дзяцей невядомы, iдзе разбор. Падрабязнасцi справы ў пракуратуры не паведамляюць у iнтарэсах следства.

Што датычыцца рабства, поўнай бяспраўнасцi чалавека, то такiя выпадкi ёсць i ў нас. Напрыклад, расследуецца крымiнальная справа па Чэрыкаўскаму раёну. Расiянiн пасялiўся ў Беларусi i набiраў сабе нешта накшталт рабоў. Папярэдне вядома, што ён вербаваў людзей падманам, потым мог пазбаўляць iх волi, замыкаць. Гэты чалавек арыштаваны, вядзецца следства.