Прыйдзi, прыйдзi ў мае абдымкi...

Источник материала:

Сённяшняе свята — адно з самых маладых i незвычайных. Дагэтуль немагчыма дакладна высветлiць аўтара iдэi асобнага «абдымальнага» дня ў годзе. Кампетэнтныя крынiцы сцвярджаюць, што вытокi Дня абдымкаў трэба шукаць у студэнцкiм асяроддзi еўрапейскай моладзi. Паводле своеасаблiвай легенды, менавiта 21 студзеня хлопцы i дзяўчаты абдымаюцца без усякiх iнтымных намёкаў, проста ад шчырасцi i шырынi душы.

Даследчыкi, са свайго боку, падводзяць пад традыцыю святкавання Сусветнага дня абдымкаў сур’ёзную, нават навуковую базу. Так, псiхолагi кажуць, што для таго, каб чалавек адчуваў сябе шчаслiвым, трэба нi многа нi мала — сем абдымкаў у дзень. Можна больш — здароўю дадатковы выплеск эндарфiну не пашкодзiць.

Наколькi важныя абдымкi, сведчыць наступная павучальная гiсторыя. У свой час iмператар Свяшчэннай Рымскай iмперыi Фрыдрых II Штаўфен (1194—1250) у перапынках памiж крыжовымi пахо-дамі здзейснiў досыць жорсткi эксперымент: групу немаўлят адабралi ў мацi i перадалi нянькам. Дзяцей дазвалялi кармiць i купаць, аднак нi ў якiм выпадку не браць на рукi, не лашчыць i нават не размаўляць. Фрыдрыху хацелася даведацца, на якой жа мове загавораць i як будуць сябе адчуваць дзецi, якiя не атрымалi бацькоўскага цяпла i нават не чулi гукаў чалавечай мовы. У вынiку — што б вы думалi? — усе немаўляты памерлi.

Iтальянскiя медыкi на чале з прафесарам Вiнчэнца Марыньяна абралi адваротны метад. На працягу 6 гадоў яны вывучалi эмацыянальны i фiзiчны стан 450 пажылых людзей i прыйшлi да фенаменальнай высновы. Людзi, якiя не шкадуюць для блiзкiх добрых слоў, пацалункаў, абдымкаў, могуць пражыць у тры разы даўжэй за тых, хто пастаянна стрымлiвае эмоцыi!

Спецыялiсты iнстытута тактыльных даследаванняў ЗША (у iх там ёсць i такi) сцвярджаюць, што прыемныя дотыкi да цела чалавека прыносяць неацэнную карысць: заспакойваюць, павышаюць iмунiтэт, стымулююць цэнтральную нервовую сiстэму. Пяшчотныя паглажваннi могуць знiзiць боль i непрыемныя адчуваннi пры хваробах, паскорыць выздараўленне i нават зрабiць чалавека больш прывабным.

Ды што там людзi! Нават мурашы, калi адзiн з iх сародзiчаў цяжка паранены, «рэанiмуюць» пацярпеўшага дотыкамi. Прабягаючы мiма параненага, мурашы па чарзе стараюцца дакрануцца да яго ножкамi цi вусiкамi, нiбыта даючы зразумець: «Гэй, сябра, ты нам патрэбны!».

Да слова, амерыканцы за час стасункаў датыкаюцца адзiн да аднаго 2—3 разы, еўрапейцы за гэты ж час паспяваюць абняцца разоў 100 i пры гэтым не ператварыць пяшчотныя абдымкi ва ўдушлiвыя. Самымi стрыманымi на праявы эмоцый традыцыйна лiчацца брытанцы, у якiх увогуле не прынята вiтаць сяброў абдымкамi. Беларусь, нагадваю — у цэнтры Еўропы. Зразумела, з каго трэба браць прыклад?..

Карацей, сёння абдымаюцца не толькi родныя i блiзкiя сябры, не толькi футбольныя каманды i iх фанаты, не толькi палiтыкi i зоркi шоу-бiзнэсу — усе без выключэння! Дакладна ведаю нават, што сваю порцыю душэўнага цяпла атрымаюць сёння самая «смачная» дзяўчына нашай рэдакцыi Аленачка Гiлеп i патэнцыяльная зорка баскетболу (на ўзроўнi Нясвiжа i ўсяго свету) Дзiма Бязмен. Праўда, у iх, акрамя Сусветнага дня абдымкаў, ёсць i iншая ўважлiвая прычына — дзень нараджэння. Астатнiм раю не забываць пра абдымкi не толькi сёння, але i ва ўсе астатнiя днi года! Абдымаю ўсiх завочна i з задавальненнем...