Указам Прэзiдэнта вызначаны парадак праверак фiнансава-гаспадарчай дзейнасцi

Источник материала:

З улiкам змяненняў i дапаўненняў, якiя ўносяцца, Парадак арганiзацыi i правядзення праверак (рэвiзiй) фiнансава-гаспадарчай дзейнасцi i прымянення эканамiчных санкцый, зацверджаны Указам Прэзiдэнта Рэспублiкi Беларусь ад 15 лiстапада 1999 г. № 673, будзе распаўсюджвацца на ўсе дзяржаўныя органы i iншыя арганiзацыi, якiя праводзяць праверкi (рэвiзii) фiнансава-гаспадарчай дзейнасцi юрыдычных асоб i iндывiдуальных прадпрымальнiкаў. Выключэнне захоўваецца толькi для камеральных падатковых праверак.

Указам устанаўлiваюцца парадак правядзення планавых i пазапланавых праверак (рэвiзiй) i адзiныя патрабаваннi да планавання дзяржаўнымi органамi i iншымi арганiзацыямi кантрольных мерапрыемстваў. Планавыя праверкi (рэвiзii) будуць праводзiцца толькi пры ўключэннi iх у каардынацыйны план кантрольнай дзейнасцi ў Рэспублiцы Беларусь цi ў вобласцi (г. Мiнску). Пры гэтым уключэнне ў такi план будзе ажыццяўляцца толькi пры ўмове ўказання кантралюючым органам канкрэтных тэм праверкi (рэвiзii), суб’екта прадпрымальнiцкай дзейнасцi, якi падлягае праверцы (рэвiзii), i тэрмiна яе правядзення.

Вызначана катэгорыя органаў (службовых асоб), якiя маюць права назначаць пазапланавыя праверкi (рэвiзii). Гэта — Прэзiдэнт Рэспублiкi Беларусь, Прэм’ер-мiнiстр i яго намеснiкi, Старшынi Камiтэта дзяржаўнага кантролю, камiтэтаў дзяржаўнага кантролю абласцей i iх намеснiкi, саветаў па каардынацыi кантрольнай дзейнасцi ў Рэспублiцы Беларусь, у абласцях i г. Мiнску, Мiнiстр па падатках i зборах, кiраўнiкi iнспекцый Мiнiстэрства па падатках i зборах па абласцях i г. Мiнску i iх намеснiкi (у адносiнах да нiжэйстаячых падатковых органаў), Мiнiстр фiнансаў, яго намеснiкi, начальнiкi галоўных упраўленняў Мiнiстэрства фiнансаў па абласцях i г. Мiнску (у адносiнах да праверак, што ажыццяўляюцца пры правядзеннi аператыўнага кантролю за мэтавым выкарыстаннем бюджэтных сродкаў), упаўнаважаныя службовыя асобы праваахоўных i судовых органаў у межах iх кампетэнцыi.

Iншыя кантралюючыя органы ў выпадку неабходнасцi правядзення пазапланавай праверкi (рэвiзii) абавязаны ўзгадняць рашэнне аб яе правядзеннi з Саветам па каардынацыi кантрольнай дзейнасцi ў Рэспублiцы Беларусь (саветам па каардынацыi кантрольнай дзейнасцi ў вобласцi цi г. Мiнску). Акрамя таго, устаноўлены вычарпальны пералiк падстаў, пры наяўнасцi якiх могуць быць прызначаны пазапланавыя праверкi (рэвiзii). Гэта — рэарганiзацыя, лiквiдацыя юрыдычнай асобы, спыненне дзейнасцi iндывiдуальнага прадпрымальнiка, наяўнасць звестак аб парушэннях заканадаўства або паступленне зваротаў, якiя патрабуюць правядзення праверкi (рэвiзii).

Дадаткова ўстаноўлена адмiнiстрацыйная адказнасць службовых асоб кантралюючых органаў, якiя парушылi парадак назначэння, узгаднення правядзення пазапланавых праверак (рэвiзiй) цi iнфармавання аб правядзеннi такiх праверак (рэвiзiй), у выглядзе штрафу ў памеры да 50 базавых велiчынь. За невыкананне рашэнняў Савета (старшыні Савета) па каардынацыi кантрольнай дзейнасцi ў Рэспублiцы Беларусь прадугледжваецца дысцыплiнарная адказнасць службовых асоб кантралюючых органаў аж да вызвалення ад займаемай пасады (звальнення). Таксама замацоўваецца абавязак кантралюючых органаў весцi ўлiк усiх выдадзеных прадпiсанняў на правядзенне праверак (рэвiзiй) фiнансава-гаспадарчай дзейнасцi. Неўнясенне работнiкамi кантралюючых органаў, кiраўнiкамi праверкi (рэвiзii) усiх звестак, вызначаных заканадаўствам, у кнiгу ўлiку праверак (рэвiзiй) будзе цягнуць iх дысцыплiнарную адказнасць.

Для дасягнення неабходнага ўзроўню каардынацыi дзейнасцi кантралюючых органаў Указам прадугледжваецца стварэнне на тэрыторыi адмiнiстрацыйна-тэрытарыяльных адзiнак (перш за ўсё ў г. Мiнску, а таксама ў iншых гарадах i раёнах) саветаў па каардынацыi кантрольнай дзейнасцi.

Акрамя таго, зыходзячы з практыкi прымянення Указа Прэзiдэнта Рэспублiкi Беларусь ад 15 лiстапада 1999 г. № 673, удакладнена працэдура накiравання матэрыялаў у праваахоўныя органы, што павiнна садзейнiчаць змяншэнню колькасцi парушэнняў крымiнальна-працэсуальнага заканадаўства, звязаных з тэрмiнамi прыняцця працэсуальных рашэнняў, а таксама вынясенню законных i абгрунтаваных рашэнняў у рамках узбуджаных крымiнальных спраў.

Прэс-служба Прэзiдэнта Рэспублiкi Беларусь.