Аляксандр АПАЦКI: «Беларусь будзе прадаваць пiтную ваду...»

Источник материала:

Сёння — Сусветны дзень вады

На гаспадарчае i пiтное водазабеспячэнне выкарыстоўваецца 41 працэнт спажываемай вады, на вытворчыя патрэбы — 31 працэнт, па лiнii сельскай гаспадаркi — каля 23 працэнтаў вады. Для пiцця ў цэнтральнае водазабеспячэнне накiроўваецца галоўным чынам вада з падземных водазабораў. Разведана 256 падземных водных радовiшчаў i ўчасткаў. Сёння краiна мае эксплуатацыйныя запасы падземнай вады ў аб’ёме 6,6 мiльёна кубiчных метраў у суткi, што на 30 працэнтаў больш за рэальны ўзровень спажывання.

За апошнiя гады iстотна палепшылiся хiмiчныя i бiялагiчныя паказчыкi вады ў Нёмане i Заходняй Дзвiне. Гэта адбылося, па меркаванню намеснiка мiнiстра, таму, што за мiнулыя 5 гадоў у краiне былi ўзведзены адразу 73 буйныя ачышчальныя збудаваннi. За гэты час прадпрыемствы рэспублiкi скарацiлi выкiд у прыродныя вадасховiшчы недастаткова ачышчанай вады на 56 працэнтаў. Разам з тым, каб увогуле не забруджваць навакольнае асяроддзе, дзяржаве патрэбна пабудаваць у гарадах 22 капiтальныя ачышчальныя ўстаноўкi i правесцi iстотную рэканструкцыю на 49 такiх аб’ектах.

Беларуская падземная вада мае нядрэнныя хiмiчныя i мiкрабiялагiчныя паказчыкi. Аднак у невялiкiх гарадах i вёсках 25 працэнтаў усёй вады па лiнii камунальнага водазабеспячэння не адпавядае мiжнародным стандартам па завышанаму ўтрыманню там жалеза i часткова марганцу, медзi i кадмiю.

Згодна з дзяржаўнай праграмай «Чыстая вада» на падземнае водазабеспячэнне былi пераведзены гарады Полацк i Гродна, пабудавана 15 водазабораў i 20 станцый абезжалезвання. На гэтыя i iншыя патрэбы спецыялiсты жыллёва-камунальнай службы выдаткавалi ажно 230 мiльярдаў рублёў. Камунальнiкi разлiчваюць праз 5 гадоў забяспечыць цэнтральным водазабеспячэннем 85,4 працэнта насельнiцтва.

Спажыванне пiтной вады на чалавека ў сярэднiм па рэспублiцы складае каля 214 лiтраў у суткi. Разам з тым, у сем’ях, якiя карыстаюцца iндывiдуальнымi лiчыльнiкамi вады, гэты паказчык складае ўжо не больш чым 180 лiтраў.

Аляксандр Апацкi заўважыў, што на тэрыторыi Беларусi цячэ больш за 20 тысяч рэк i ручаёў, каля 10 тысяч азёраў, 144 буйныя вадасховiшчы i прыкладна 1500 сажалак. Агульныя рэсурсы павярховых водаў складаюць 58 мiльярдаў кубiчных метраў вады, а падземнай прэснай — 16—18 мiльярдаў «кубоў». З гэтых вялiкiх запасаў мы выкарыстоўваем каля 3—3,5 працэнта вады. У перспектыве наша краiна можа стаць буйным экспарцёрам мiнеральнай i пiтной вады ў рэгiёны з праблемным водазабеспячэннем, лiчыць намеснiк мiнiстра.