У Савеце Рэспублiкi — структурныя змены

Источник материала:

Парламенцкі дзённік

Парламентарыi, у прыватнасцi, адобрылi праект Закона «Аб унясеннi дапаўнення ў Закон Рэспублiкi Беларусь «Аб унясеннi змяненняў i дапаўненняў у законы Рэспублiкi Беларусь па пытаннях абарачэння i выкарыстання iмянных прыватызацыйных чэкаў «Жыллё». Адобраны дакумент прадугледжвае працяг тэрмiну перарэгiстрацыi чэкаў «Жыллё» да 1 студзеня 2007 года.

Таксама члены Савета Рэспублiкi адобрылi праект Закона «Аб унясеннi змяненняў i дапаўненняў у некаторыя заканадаўчыя акты Рэспублiкi Беларусь па пытаннях спрашчэння парадку ажыццяўлення натарыяльных дзеянняў». Паводле слоў старшынi Пастаяннай камiсii Савета Рэспублiкi па заканадаўству i дзяржаўнаму будаўнiцтву Наталлi Андрэйчык, законапраект забяспечвае ўвядзенне ў работу натарыята краiны прынцыпу «аднаго акна». Акрамя таго дакументам «устанаўлiваецца адмiнiстрацыйная адказнасць за парушэнне тэрмiнаў здзяйснення натарыяльных дзеянняў...».

Парламентарыi прынялi таксама да ведама Дэкрэт Прэзiдэнта Рэспублiкi Беларусь ад 9 лютага 2006 года № 2 «Аб унясеннi змянення ў Дэкрэт Прэзiдэнта Рэспублiкi Беларусь ад 5 лютага 1997 года № 1». Паводле слоў старшынi Пастаяннай камiсii Савета Рэспублiкi па эканомiцы, бюджэту i фiнансах Сцяпана Пiсарэвiча, разгледжаны Дэкрэт адмяняе патрабаванне рэгiстраваць пашпартныя даныя пры набыццi замежнай валюты...

Члены верхняй палаты беларускага парламента адобрылi таксама структурныя змены ў Савеце Рэспублiкi. Так, была лiквiдавана Пастаянная камiсiя па сацыяльных пытаннях. Адначасова былi створаны дзве новыя камiсii — Пастаянная камiсiя па дэмаграфiчнай бяспецы i сацыяльнаму развiццю i Пастаянная камiсiя па адукацыi, навуцы, культуры i гуманiтарных пытаннях. Старшынёй першай створанай камiсii была абрана былы мiнiстр аховы здароўя Беларусi Людмiла Пастаялка. Старшынёй другой створанай камiсii быў абраны Анатоль Новiкаў, якi ўзначальваў лiквiдаваную Пастаянную камiсiю Савета Рэспублiкi па сацыяльных пытаннях.