Велапрабегам — за сяброўства i здаровы лад жыцця

Источник материала:

У велапрабегу бяруць удзел 15 маладых расiян. Яны — студэнты i аспiранты ВНУ Смаленска.

Арганiзаваў велапрабег маладзёжны парламент, якi працуе пры Смаленскай абласной думе.

— Наш велапрабег прымеркаваны да 61-й гадавiны Перамогi ў Вялiкай Айчыннай вайне, — расказаў аспiрант Смаленскага дзяржаўнага унiверсiтэта Дзмiтрый Цяплухiн. — Мы яшчэ маем на мэце папулярызацыю здаровага ладу жыцця — нiхто з удзельнiкаў велапрабегу не курыць i не злоўжывае алкаголем. А таксама спадзяёмся на аднаўленне кантактаў i сувязяў, якiя былi страчаны памiж нашымi краiнамi пасля распаду СССР.

Расiяне зрабiлi прыпынак у Горках. Гаспадары сустрэлi велапрабег хлебам-соллю.

У райцэнтры расiяне пазнаёмiлiся з Беларускай сельскагаспадарчай акадэмiяй, правялi таварыскую сустрэчу па валейболу, а таксама наладзiлi для горацкiх студэнтаў i выкладчыкаў прэзентацыю свайго маладзёжнага парламента. Ён iснуе ў Смаленскай вобласцi каля 5 гадоў i з’яўляецца своеасаблiвым «лобi» моладзi i студэнтаў у органе дзяржаўнай улады, а таксама i школай лiдарства для маладых людзей.

У выхадныя днi мiжнародны велапрабег пабывае ў Мсцiславе i Крычаве, а 14 мая праз расiйскi райцэнтр Хiславiчы вернецца ў Смаленск. Яго ўдзельнiкi праедуць паўтысячы кiламетраў, i па вяртаннi iм будзе прысвоены спартыўны разрад.

У наступным годзе да расiян мяркуюць далучыцца маладыя аматары веласпорту з Беларусi.

Iлона IВАНОВА,

Горацкi раён.