Пракуроры супраць крыўдзiцеляў дзяцей

Источник материала:

Злачыннасць не ведае нi геаграфiчных, нi этычных, нi маральных, а падчас i ўзроставых межаў. Пасля распаду СССР лiтаральна ва ўсiх постсавецкiх краiнах дзецi нярэдка становяцца ахвярамi злачынстваў. Вельмi часта ўшчымляюцца правы маленькiх грамадзян. Пра актуальнасць праблемы абароны правоў i законных iнтарэсаў непаўналетнiх яскрава сведчыць той факт, што яна абмяркоўвалася на чарговым пасяджэннi Каардынацыйнага савета генеральных пракурораў дзяржаў — удзельнiц СНД.

Больш таго, удзельнiкi самiта генпракурораў падпiсалi спецыяльнае пагадненне, бо, паводле слоў Генеральнага пракурора Расii Уладзiмiра Усцiнава, гэтая праблема актуальная для ўсiх без выключэння краiн Садружнасцi. Кiраўнiк расiйскай пракуратуры падкрэслiў, што «пытаннi, якiя абмяркоўвалiся на нарадзе, датычацца недапушчэння любога насiлля над непаўналетнiмi».

Пра тое, што эфектыўна змагацца з крыўдзiцелямi дзяцей можна толькi супольна, лепш за ўсё сведчаць канкрэтныя справы. Напрыклад, беларускiя пракуроры з дапамогай расiйскiх, а таксама амерыканскiх праваахоўных органаў вывелi на чыстую ваду добра арганiзаваную транснацыянальную злачынную групоўку, якая займалася вырабам i распаўсюджваннем у Iнтэрнэце дзiцячай парнаграфii. Маецца на ўвазе мiнская крымiнальная групоўка пад назвай «пасялковыя». Першымi выйшлi на след беларускiх порнадзялкоў амерыканцы. Яшчэ на пачатку 2002 года служба бяспекi Visa International высветлiла, што асобныя клiенты гэтай плацежнай сiстэмы маюць доступ да сайтаў, на якiх публiкуюцца дзiцячыя порна- здымкi. «Нiтачка» пацягнулася ў Беларусь i Расiю. У хуткiм часе ў поле зроку праваахоўных органаў нашай краiны апынулася расiйская плацежная сiстэма «КiберПлат», што належала банку «Плацiна». Сумеснымi намаганнямi гэты канал перакачкi грошай з кiшэняў багатых амерыканцаў у кашалькi вытворцаў дзiцячай парнаграфii быў перакрыты. Аднак i зусiм несвятое месца доўга не пуставала. Пасля скандалу з «КiберПлатам» цэнтр порнаiндустрыi перамясцiўся ў Беларусь пад крыло «пасялковай» крымiнальнай групоўкi.

Як высветлiлася падчас расследавання, у альянсе з бандытамi зноў былi задзейнiчаны расiйскiя фiнансавыя структуры. У прыватнасцi, у матэрыялах гэтай крымiнальнай справы фiгуруе расiйская кампанiя «Альфа-Пей», якая мела дагавор аб супрацоўнiцтве з «Альфа-банкам». Толькi за тры месяцы работы бiлiнгавай кампанii «порнадзялкi» правялi праз «Альфа-банк» больш за 1 мiльён 771 тысячу долараў. Колькi грошай насамрэч зарабiлi на дзецях вытворцы парнаграфii i iх салiдныя памагатыя, дакладна невядома. «Пасялковы» цэх порнаiндустрыi дзейнiчаў пад Мiнскам амаль паўтары гады.

Зрэшты адзiн з арганiзатараў порнабiзнэсу Андрэй Рубацкi здолеў уцячы ад беларускага правасуддзя. Паводле некаторых звестак, зараз ён хаваецца ў Расii i нават не кiнуў свайго злачыннага занятку, стварыў у Санкт-Пецярбургу студыю дзiцячага порна.

Так што праваахоўным органам РФ яшчэ неабходна давесцi гэтую крымiнальную справу да лагiчнага канца. I ў гэтым плане для прадстаўнiкоў расiйскай пракуратуры быў вельмi карысны абмен вопытам з беларускiмi калегамi, якiя паспяхова змагаюцца порнабiзнэсам.

Увогуле, як паведамiў Генеральны пракурор Беларусi Пётр Мiклашэвiч, у Мiнску кiраўнiкi пракуратур краiн СНД папрацавалi вельмi плённа. На пракурорскiм самiце было разгледжана 14 пытанняў, падпiсана 2 пагадненнi.