Беларусь для дзяцей разам з дзецьмi

Источник материала:

У межах акцыi быў арганiзаваны абласны конкурс творчых работ навучэнцаў «Сэрцам адданы роднай зямлi», скiраваны на фармiраванне ў маладога пакалення нацыянальнай самасвядомасцi, патрыятызму, адказнасцi за будучыню. На разгляд журы паступiла 208 творчых работ школьнiкаў i 62 навучэнцаў ПТВ i каледжаў у самых розных жанравых формах (лiтаратурны расказ, нарыс, эсэ, сачыненне, паэма, цыкл вершаў, iнтэрв’ю, рэпартаж, сцэнарый i iнш.) Конкурс праводзiўся па наступных намiнацыях: «Усё шчасце зямлi — за працай!», «Цуд роднай зямлi», «Лёс маёй сям’i ў лёсе маёй краiны», «Рукамi мацi зямля сагрэта», «Бацькаўшчыне прысвячаецца...»

— Прачытаўшы творчыя работы, я быў вельмi ўзрадаваны тым, якiя ў нас ёсць таленавiтыя, разумныя, не па ўзросту мудрыя дзецi, — дзелiцца ўражаннямi член журы, паэт, член Саюза пiсьменнiкаў Беларусi Уладзiмiр Карызна. — На конкурсе прадстаўлена сапраўдная лiрыка, паэтычны крык душы. Прычым выклiкае здзiўленне i захапленне свежасць слова i самавыказвання, а таксама высокi майстэрскi ўзровень маладых аўтараў. Мы, маё пакаленне паэтаў, што змаглi, зрабiлi. Прыемна ўсведамляць, што ў нас ёсць адораная змена, маладое полымя.

14 абсалютных пераможцаў конкурсу атрымалi дыпломы ўпраўлення адукацыi Мiнаблвыканкама, яшчэ 78 дыпломаў вучэбна-метадычнай установы «Мiнскi абласны вучэбна-метадычны кабiнет» атрымалi навучэнцы школ, 27 — навучэнцы ПТВ i 13 — педагагiчных каледжаў. Падвядзенне вынiкаў i ўрачыстая цырымонiя ўзнагароджання прайшлi 1 чэрвеня на цэнтральнай плошчы Заслаўя падчас абласнога свята «Беларусь для дзяцей разам з дзецьмi».

Падобная акцыя праводзiцца ў вобласцi кожны год. Як падкрэслiў першы намеснiк начальнiка ўпраўлення адукацыi Мiнаблвыканкама Мiкалай Кулеш, на Мiншчыне створаны ўсе ўмовы для выканання Канвенцыi аб правах дзiцяцi i Закона Рэспублiкi Беларусь «Аб правах дзiцяцi». У вобласцi будуюцца новыя дашкольныя ўстановы (дзiцячыя садкi ў Чысцi Маладзечанскага раёна, у Крупках), адкрываюцца новыя тыпы ўстаноў (яслi-сад, школа-сад). Для аздараўлення дзяцей на Мiншчыне працуюць 7 санаторных лагераў, адкрыта 61 група санаторнага накiрунку. Летам звыш 73 тысяч дзетак вывезуць на адпачынак у загарадныя лагеры, з iх каля 30 тысяч будуць аздараўляцца кругласутачна.

Заслаўе.