Лазня з... Iнтэрнэтам

Источник материала:

Старшыня Мiнаблвыканкама Мiкалай ДАМАШКЕВIЧ расказаў, што раней у бюджэце не было дастатковых сродкаў, каб завяршыць будаўнiцтва аб’ектаў, узвядзенне якiх пачалося гадоў пятнаццаць, а то i больш, таму:

— За пяць гадоў бюджэт павялiчыўся амаль у пяць разоў. Гэта дазволiла заняцца сацыяльнай сферай. Да канца года засталося завяршыць яшчэ некалькi даўгабудаў — бальнiц у Валожыне i Старобiне, напрыклад.

Адметна, што пры будаўнiцтве таго цi iншага аб’екта вельмi высокiя патрабаваннi прад’яўляюцца да ўнутранага i знешняга выгляду:

— Трэба, каб новабудоўлі былi па-сапраўднаму сучасныя — у плане i камфорту, i прасторы, i ўтульнасцi, i прыгажосцi памяшканняў. Хачу выказаць падзяку будаўнiкам Мiншчыны — няма такой работы, якую б яны не выканалi, — падкрэслiў Мiкалай Дамашкевiч. — А вось праекты будучых будынкаў, i гэта вельмi строгае патрабаванне, павiнны быць самымi сучаснымi, улiчваць усе сусветныя архiтэктурныя распрацоўкi.

Лазня ў Мар’iнай Горцы была ўзведзена менавiта па такiх прынцыпах. Пра еўрапейскую якасць аздаблення, прасторныя памяшканнi з месцамi для адпачынку доўга казаць не будзем. Першыя наведвальнiкi, заўзятыя аматары пары, расказалi, што нават у сталiцы яны не бачылi такога высокага ўзроўню. У лазнi ёсць усё: парыльныя памяшканнi з вялiкiм i малым басейнамi, на двух паверхах размясцiлiся ўтульныя кафэ з бiльярдам, кабiнет манiкюру i педыкюру, масажная зала, салярый (жанчыны горада былi вельмi задаволеныя гэтым), цырульня. Працуе аптэка — акрамя iншага, яна будзе гандляваць спецыяльнымi лекавымi напоямi. I нават... камп’ютарны клас. Напэўна, гэта першая лазня, у якой пасля добрай пары можна выйсцi ў Iнтэрнэт.