Медыцынская дапамога. Пытаннi i адказы

Источник материала:

(Працяг. Пачатак у нумарах за 18, 20 кастрычніка.)

Вера Вiктараўна, г. Маладзечна:

— У маёй бабулi пачалiся праблемы з успрыманнем. Яна часта неадэкватная. Трэба да спецыялiста на прыём звяртацца, аднак старая ляжачая. Мiж тым, у бабулi адзначаецца пагаршэнне адчування. Я ведаю, што ёсць спецыяльныя методыкi лячэння. У гэтым выпадку нельга згубiць час. Аднак чым можна дапамагчы?

— Сапраўды, ёсць такiя сiтуацыi, калi стан хворага неабходна купiраваць з дапамогай лекаў. У такiм разе трэба дзейнiчаць неадкладна. Вашу бабулю спецыялiсты агледзяць дома, пасля чаго ёй будзе прызначана падтрымлiваючая лекавая тэрапiя.

Галiна Iльiнiчна ШЫТОВIЧ, вёска Бальбы Смаргонскага раёна:

— Неаднойчы ляжала ў раённай бальнiцы — у мяне праблемы з сэрцам. Таксама лячылася i ў чацвёртай клiнiчнай бальнiцы сталiцы. Аднак усё безвынiкова. Жывём удваiх са старым, дапамагчы няма каму. Як паступiць?

— Без дапамогi, Галiна Iльiнiчна, дакладна не застаняцеся. Трэба ўдакладнiць iнфармацыю аб вашым захворваннi, i тады прымем рашэнне аб тым, куды вас шпiталiзаваць. Знойдзем магчымасць сур’ёзна заняцца вашым лячэннем.

Нiна РЫХЦIК, г. Мiнск:

— Я мацi траiх дзяцей. Прыемна было даведалася аб тым, што для шматдзетных сем’яў ёсць асобныя днi для абслугоўвання ў дзiцячых стаматалагiчных палiклiнiках. Цi ёсць яшчэ якiя-небудзь ільготы ў гэтым плане?

— Канешне, праграма падтрымкi шматдзетных сем’яў мае дзяржаўны ўзровень. Гэта датычыцца i медыцынскага абслугоўвання. Па ўсiх пытаннях, якiя ўзнiкаюць, для гэтай катэгорыi пацыентаў «зялёная вулiца». Усе iх праблемы вырашаюцца. Ваша права — у першую чаргу iсцi на абслугоўванне. Па ўсiх накiрунках. Гэта датычыцца як дзяцей, так i бацькоў. Працэдура такая: заходзiце адразу ў даўрачэбны кабiнет, заяўляеце свой статус (прадастаўляеце адпаведны дакумент, якi яго пацвярджае), i вам дапамогуць прайсцi абследаванне i атрымаць кансультацыю без усялякiх чэргаў.

Вiктар Iосiфавiч СIВЫ, вёска Рушаўшчына Клецкага раёна:

— Не магу нават сто метраў прайсцi — вельмi ногi баляць. У мяне шмат захворванняў. Дзе можна атрымаць кампетэнтную кансультацыю i прайсцi лячэнне?

— Перш за ўсё, Вiктар Iосiфавiч, неабходна прайсцi сур’ёзнае абследаванне. Лепш за ўсё гэта зрабiць у навукова-даследчым iнстытуце траўматалогii i артапедыi, якi працуе ў Мiнску. Вазьмiце ўсе патрэбныя дакументы i прыязджайце на прыём да спецыялiстаў. Пасля абследавання можна будзе вызначыцца i наконт эфектыўнага лячэння.

Марыя ЧЫЖ, г. Мiнск:

— Зараз шмат гаворыцца аб падтрымцы цяжарных i павелiчэннi нараджальнасцi. Аднак у жанчын iснуюць нявырашаныя праблемы. Напрыклад, адна з самых вострых — у камерцыйных медыцынскiх цэнтрах, дзе абслугоўваюцца жанчыны (у выпадках, калi дзяржаўная медыцына не можа дапамагчы), не маюць права выдаваць бальнiчныя лiсты. Гэта вялiкая праблема, паколькi жанчыне фактычна робiцца аперацыя i яна вымушана вырашаць пытаннi наконт сваёй адсутнасцi на рабоце ў прыватным парадку. Паколькi няма iншых варыянтаў. Цi плануецца што-небудзь прадпрыняць у гэтым накiрунку?

— Вы закранулi вельмi важнае, праблемнае пытанне. Сапраўды, у камерцыйных медыцынскiх цэнтраў ёсць права на дыягностыку i на лячэнне, а вось на экспертызу працаздольнасцi ў iх права няма. Аднак гэта могуць зрабiць дзяржаўныя ўстановы — да прыкладу, жаночая кансультацыя, за якой вы замацаваны i дзе абслугоўваецеся. Стымуляванне нараджальнасцi — гэта сумесная работа прыватнага i дзяржаўнага сектараў медыцыны. Таму для таго каб атрымаць бальнiчны, вы на законных падставах можаце звярнуцца ў жаночую кансультацыю, а таксама (калi ўзнiкае такая неабходнасць) — выклiкаць урача на дом. Мы сур’ёзна абмяркуем гэтую праблему i магчыма прымем пэўнае рашэнне на ўзроўнi мiнiстэрства.

Марыя Максiмаўна ЦУЛIМАВА, вёска Адраджэнне Жлобiнскага раёна:

— Хварэю на гальваноз. Вызначылi, што ў мяне праблемы са слiннымi залозамi, балiць язык. Аднак лячэння не атрымлiваю — на месцы гэта немагчыма. Што рабiць?

— У вашым выпадку стан здароўя — iндывiдуальны для кожнага пацыента. Таму неабходна разбiрацца, маючы на руках вынiкi даследаванняў. Вам неабходна прыехаць у Рэспублiканскую клiнiчную стаматалагiчную палiклiнiку. Там дакладна вызначаць усе акалiчнасцi вашага захворвання i можна будзе весцi гаворку пра лячэнне.

Вера Аляксандраўна ЦIШКIНА, г. Мiнск:

— Абслугоўваюся ў гарадской палiклiнiцы № 16. У нас няма ўчастковага ўрача. I ўвогуле арганiзацыя медыцынскага абслугоўвання не на належным узроўнi. У мяне востры артроз, а лячэння не атрымлiваю. I адносiны з боку спецыялiстаў, мякка кажучы, не самыя лепшыя. Нядаўна вось «згубiлi» маю картку, атрымлiваецца, што ўсе абследаваннi трэба будзе зноў пачынаць. Цi не маглi б вы пасадзейнiчаць у вырашэннi маiх пытанняў?

— Можам i будзем садзейнiчаць. Тут нельга маўчаць — думаю, што ваш званок стане падставай для сур’ёзнай размовы ў Камiтэце па ахове здароўя Мiнскага гарвыканкама. I наконт лячэння: з вамi абавязкова звяжуцца i вызначацца наконт неабходных працэдур.

Святлана, г. Мiнск:

— Зараз у шэрагу палiклiнiк арганiзавана аказанне платных медыцынскiх паслуг. Нядаўна мая мацi праходзiла адну з працэдур за грошы. Плату ў яе ўзялi без усялякага афармлення. Няўжо зараз устаноўлены такi парадак?

— Гэта сiтуацыя, якой быць не павiнна. Тут яўнае адступленне ад агульнапрынятага прававога нарматыву: бухгалтар афармляе дагавор, каса выпiсвае чэк, а спецыялiст аказвае паслугу. Толькi такiм чынам, нiякiх iншых варыянтаў не дапускаецца. Палiклiнiка можа аказваць платныя медыцынскiя паслугi, аднак гэта павiнна быць арганiзавана па ўстаноўленых правiлах.

— У стаматалогii таксама аказваюцца платныя паслугi. У такiм выпадку выкарыстоўваюцца iншыя матэрыялы, чым звычайна?

— Стандарт у абодвух выпадках аднолькавы. Гэта агульны падыход. I матэрыялы аднолькавыя. Пацыент у такiм выпадку плацiць за павышаны камфорт, больш дасканалы сэрвiс.

(Працяг будзе.)