Каму будуць спiсваць «камунальную» пеню?

25.08.2009 22:07 — |

Размер текста:: A; A; A

Источник материала:

Мiкалай ЛIТВIНАЎ

Плацяжы за кватэру мы павiнны ўносiць штомесяц да 25-га чысла. За кожны дзень пратэрмiноўкi налiчваецца пеня — 0,3 працэнта ад сумы запазычанасцi. Гэтыя «штрафныя санкцыi» пэўным чынам стымулююць своечасовасць разлiкаў насельнiцтва. Аднак у жыццi рознае бывае. Здараецца, што даўгi «збiраюцца» i па ўважлiвых прычынах (да прыкладу, падчас працяглай хваробы). Як быць у такой сiтуацыi?

Вырашыць пытанне павiнна новая норма, якая ўведзена ўказам кiраўнiка дзяржавы ад 6 кастрычнiка 2006 г. № 604 «Аб мерах па павышэнню эфектыўнасцi работы жыллёва-камунальнай гаспадаркi». У адпаведнасцi з гэтым дакументам вызначана, што пеня можа спiсвацца па рашэнню мясцовых выканаўчых i распарадчых органаў. Спецыяльны парадак павiнен быць акрэслены пастановай урада, праект якой падрыхтаваны, але пакуль не зацверджаны.

Як паведамiлi карэспандэнту «Звязды» ў Мiнiстэрстве жыллёва-камунальнай гаспадаркi, мяркуецца, што пеня будзе спiсвацца пры ўмове выплаты асноўнага доўгу па разлiках за кватэру. Такое рашэнне поўнасцю знаходзiцца ў кампетэнцыi мясцовых уладаў i можа быць прынята пасля дэталёвага разгляду прычын узнiкнення запазычанасцi. Спiсанне пенi, адзначылi ў Мiнжылкамунгасе, — мера, якая павiнна прымацца ў выключных выпадках.