Крытыка прызнана правiльнай

Источник материала:

Па слядах нашых выступленняў

Артыкул быў абмеркаваны ў Мiнiстэрстве сельскай гаспадаркi i харчавання, i намеснiк мiнiстра В. ПАЎЛОЎСКI паведамiў нам наступнае. Сапраўды, распрацаваная РУНIП IМСХ «НАН Беларусi» бульбасаджалка СК-4 (вытворца — ААТ «Мотавела») мела шэраг iстотных недапрацовак. Выраблены новы ўзор машыны, якi прайшоў выпрабаваннi на ГУ «Беларуская машынавыпрабавальная станцыя» ў жнiўнi сёлета.

Правiльная заўвага выказана i адносна якасцi вырабляемай тэхнiкi РУП «Гомсельмаш» i ААТ «Гiдрасельмаш». У ходзе эксплуатацыi ўборачных машын гэтых прадпрыемстваў летась быў выяўлены шэраг iстотных недахопаў, па якiх сёлета яны выканалi комплекс канструктарскiх i тэхналагiчных мерапрыемстваў. I гэта дазволiла ў пэўнай ступенi палепшыць надзейнасць пастаўляемых машын.

Пастаўлены 101 бульбаўборачны камбайн ПКК-2-02. Тэхнiчнае выкананне машыны i якасць выканання тэхналагiчнага працэсу дазваляюць убiраць за дзень ад двух да чатырох гектараў бульбы пры адносна невялiкiх стратах.

Што датычыцца заўваг па бульбасартавальных пунктах, дык у адкрытым акцыянерным таварыстве «Бабруйскаграмаш» асвоены ў апошнi час такiя пункты (ПКСП-25), i яны адпавядаюць замежным аналагам. Сёлета такiх пунктаў у сельскагаспадарчыя арганiзацыi рэспублiкi пастаўлена шэсць.

Атрымалi мы рэагаванне на артыкул i ад галоўнага канструктара па кормаўборачнай тэхнiцы РКУП «ГСКБ» (Гомель) А. РАХЛIЦКАГА. Ён паведамляе, што касiлка-здрабняльнiк КIН-Ф-1500 вытворчасцi завода лiцця i нармаляў з 1994 года прызначана для скошвання зялёных траў, кукурузы i iншых сiласуемых культур вышынёй не больш за 1,2 метра з адначасовым здрабненнем i пагрузкай у транспартныя сродкi. Але магчыма i выкарыстанне яе для ўборкi бацвiння бульбы. Сёлета яна прайшла працэдуру сертыфiкацыi на адпаведнасць патрабаванням стандартаў Еўрапейскага саюза i адна з першых машын «Гомсельмаша» атрымала права на маркiроўку знакам «СЕ».

Аднак у сувязi з публiкацыяй у «Звяздзе» заўваг у адрас прадпрыемства РКУП «ГСКБ» у канцы верасня накiравала пiсьмо генеральнаму дырэктару Гомельскай абласной асацыяцыi плодаагароднiннай прадукцыi i бульбы В. Папкову з просьбай паведамiць падрабязней аб наяўных крытычных заўвагах па касiлцы пры выкарыстаннi яе на кашэннi бацвiння бульбы, бо дадзены вiд работ сапраўды мае спецыфiчныя асаблiвасцi, звязаныя з рэльефам поля (наяўнасцю грабянёў). У адпаведнасцi з iснуючай у РУП «Гомсельмаш» практыкай па вынiках прадстаўленых iм матэрыялаў прадпрыемства прыме ўсе магчымыя захады, каб максiмальна ўлiчыць патрабаваннi спажыўцоў.

Не абышоў маўчаннем артыкул i дырэктар ААТ «Гiдрасельмаш» В. ЧАКУЛАЕЎ. Ён паведамiў, што ў 2005 годзе па заказу ААТ «Гомельаблаграсэрвiс» была выраблена партыя касiлак, якая адпраўлена на Гомельшчыну. Пры паступленнi новых заказаў заўвагi спажыўцоў па канструкцыi машыны будуць улiчаны.