Пенсiйны стаж пацвердзiць дагавор

Источник материала:

Паводле слоў галоўнага спецыялiста аддзела пенсiйнага заканадаўства Мiнiстэрства працы i сацыяльнай абароны Алены Гомаравай, як i раней, у стаж залiчваюцца перыяды работы, прадпрымальнiцкай i iншай дзейнасцi, на працягу якой грамадзянiн краiны рабiў узносы дзяржаўнага сацыяльнага страхавання, а таксама так званыя «крэдытныя» перыяды — да прыкладу, час праходжання тэрмiновай вайсковай службы цi догляду дзiцяцi ва ўзросце да 3 гадоў. Прычым з 1 студзеня 2003 года гэтыя перыяды пацвярджаюцца данымi iндывiдуальнага персанiфiкаванага ўлiку. А да 1 студзеня 2003 года — дакументамi з месца работы, вучобы, звесткамi архiваў цi iншых «паўнамоцных» устаноў. Плюс да таго, захоўваецца магчымасць пацвярджэння стажу паказаннямi не менш чым двух сведкаў, якiя ведаюць чалавека па сумеснай працоўнай дзейнасцi i самi маюць на конт гэтага неабходныя дакументы.

Разам з тым, зазначыла Алена Гомарава, апошнiм часам у парадку пацвярджэння стажу з’явiлiся некаторыя змены. Скажам, зараз, незалежна ад працягласцi знаходжання на ўлiку ў службе занятасцi насельнiцтва, у стаж для прызначэння пенсii залiчваецца не больш чым 6 месяцаў «беспрацоўнага» адрэзку жыцця.

Другое новаўвядзенне датычыцца дзяржслужачых. З iх спецыяльнага стажу, якi дае права на пенсiю па выслузе гадоў, выключаюцца перыяды, калi дзяржслужачы часова не працаваў — да прыкладу, у сувязi са знаходжаннем у адпачынку без захавання заплаты.

Адначасова палажэнем урэгуляваны пытаннi пацвярджэння спецыяльнага стажу пры рабоце са шкоднымi i небяспечнымi ўмовамi, на лiквiдацыi аварыi на Чарнобыльскай АЭС i работы ў зонах радыеактыўнага забруджвання. Апроч таго, спрошчаны парадак залiку ў стаж часу догляду дзiцяцi-iнвалiда ва ўзросце да 18 гадоў цi састарэлага, якi дасягнуў 80-гадовага ўзросту.

Нарэшце, яшчэ адзiн адметны нюанс. Палажэннем вызначаны парадак вылiчэння «пенсiйнага» стажу асобам, якiя працуюць па грамадзянска-прававых дагаворах. Для пацвярджэння стажу ў такiм выпадку зараз неабходны сам дагавор, даведка аб плаце ўзносаў дзяржаўнага сацыяльнага страхавання, а пры рабоце з 1 лiпеня 1998 года па 1 студзеня 2003 года — таксама даведка аб даходах, з якiх рабiлiся страхавыя адлiчэннi.