Камерцыйны шпiянаж на «Белшыне»

Источник материала:

Падрабязнасцi

Паводле iнфармацыi, эканамiст аддзела па рабоце з краiнамi далёкага замежжа наўмысна i незаконна збiраў звесткi аб фiнансавых аперацыях Бабруйскага шыннага камбiната з замежнымi прадпрыемствамi. Рабiў ён гэта ў парушэнне ўсiх патрабаванняў i пасадавых iнструкцый з кастрычнiка 2005 года да моманту затрымання.

Кожны з супрацоўнiкаў гэтага аддзела валодаў iнфармацыяй пра дачыненнi толькi адной з фiрмаў-партнёраў завода. Абменьвацца альбо паведамляць яе трэцiм асобам катэгарычна забараняецца. Таму, каб атрымаць звесткi пра iншыя фiрмы (аб’ёмы паставак, фiнансавыя аперацыi i iншае) ён стаў тайна рабiць копii рабочых дакументаў сваiх калег. А таксама выкарыстоўваць для гэтага сеткавы сервер. Сабраная iнфармацыя па Iнтэрнэту з электроннага адраса камбiната перадавалася за ўзнагароджанне зацiкаўленым прадстаўнiкам замежных кампанiй з ЗША, Лiтвы, Англii i Аўстралii.

Эканамiст быў затрыманы ў сваiм рабочым кабiнеце, i ў ходзе вобыску там знайшлi 14,5 тысячы долараў ЗША.

Эспертная камiсiя сабраныя iм звесткi прызнала камерцыйнай тайнай прадпрыемства. Там былi дакументы, якiя раскрывалi рынкавую стратэгiю канцэрна «Белнафтахiм» i прадпрыемстваў, якiя ў яго ўваходзяць, а таксама звесткi пра вытворчыя магутнасцi «Белшыны», плануемыя аперацыi па закупу i продажу тавараў, тактыку перамоў i кола асоб i фiрмаў, з якiмi мяркуецца iх весцi.

Прэс-група УКДБ адзначае, што крымiнальная справа паводле артыкула 54 Крымiнальнага кодэкса «Камерцыйны шпiянаж» была распачата ўпершыню ў Беларусi. Практыкi расследавання падобных выпадкаў не было. Раней не было i распрацаванай методыкi падлiку эканамiчнага ўрону ад камерцыйнага шпiянажу, у тым лiку i ўпушчанай прадпрыемствам выгады. Але паводле папярэднiх даных, сума ў гэтым выпадку даволi значная.

Цяпер усе матэрыялы справы перададзены ў суд, якi разбярэ справу i вынесе сваё рашэнне.