Плот на ўчастку паставяць за кошт мясцовай гаспадаркi

Источник материала:

«Участак, дзе стаiць дом, будаўнiкi пакiнулi ўвесь у калдобiнах, з кучамi пяску. Давялося яго выраўноўваць, балазе, старшыня гаспадаркi выдзелiла трактар. Але праблемы ўсё роўна засталiся. Так, на ўчастку ёсць каналiзацыйныя калодзежы, але знаходзяцца яны ў ямiнах-панiжэннях. Калi iх засыпаць (а рабiць гэтага ўвогуле нельга, да iх павiнен быць свабодны доступ), вышыня зямлi над люкамi будзе, напэўна, з паўметра. Што рабiць? Другая праблема — адсутнасць плоту. А як без яго?».

Сiтуацыю, на наш погляд, ускладняе тое, што, акрамя наяўнасцi ў сям’i траiх дзяцей, сама Iрына Мiкалаеўна працуе сацыяльным работнiкам (адпаведна, можна меркаваць, што заробак у яе не вельмi вялiкi), а муж — iнвалiд II групы (працаваць яму ўвогуле нельга). Усе гэтыя факты i аргументы мы выклалi намеснiку старшынi па будаўнiцтву i жыллёва-камунальнай гаспадарцы Валожынскага райвыканкама Iосiфу ЛЯШКЕВIЧУ, дадаўшы просьбу паспрыяць нейкiм чынам заяўнiцы ў вырашэннi праблем яе сям’i. У сваю чаргу Iосiф Iванавiч звязаўся са старшынёй мясцовай гаспадаркi «Падбярэззе» Тамарай ДАСЮКЕВIЧ, пасля чаго паведамiў нам наступнае:

— Пры будаўнiцтве жылля, пра якое iдзе гаворка, крэдыт за кошт дзяржавы можа выдзяляцца на 95 працэнтаў ад сумы каштарысу. Астатнiя 5 працэнтаў iдуць за кошт гаспадаркi. Таму памянёны плот будзе выраблены за кошт «Падбярэззя». Дарэчы, яно ўжо аказала дапамогу сям’i ў правядзеннi ўнутраных аддзелачных работ.

Што датычыцца каналiзацыйных калодзежаў, дык устаноўлены яны былi ў адпаведнасцi з нормамi. Аднак потым на ўчастку была праведзена падсыпка грунту, з-за чаго памянёныя калодзежы аказалiся нiжэй, чым iм належала быць. «У хуткiм часе ў вёсцы зноў будуць працаваць будаўнiкi. Яны паднiмуць-наросцяць калодзежы да патрэбнай вышынi, — запэўнiў нас Iосiф Ляшкевiч. — Работы будуць праведзены за кошт мясцовай гаспадаркi».