Прэзiдэнт Беларусi наведаў падземны грамадска-гандлёвы цэнтр «Сталiца»

Источник материала:

Вiзiты кiраўнiка дзяржавы напярэдаднi Новага года на розныя сацыяльна значныя аб’екты сталi ўжо добрай традыцыяй. «Сталiца» — унiкальны для Беларусi шматфункцыянальны гандлёвы цэнтр, якi ўжо заслужыў высокую ацэнку замежных гасцей.

Як расказаў Прэзiдэнту галоўны архiтэктар Мiнска Вiктар Нiкiцiн, пры будаўнiцтве грамадска-гандлёвага цэнтра «Сталiца» ўлiчваўся лепшы вопыт еўрапейскiх краiн. Цэнтр «Сталiца» размешчаны на чатырох падземных паверхах агульнай плошчай 103 тыс. кв.м. Тут знаходзiцца паркiнг, дзе прадугледжана месца для амаль 500 легкавых аўтамабiляў. У комплексе — больш за 100 розных магазiнаў, кiёскi, кафэ, рэстараны, бары, аддзяленнi банкаў, залы гульнявых аўтаматаў, бiльярдны клуб, даведачна-iнфармацыйныя службы.

Пры будаўнiцтве прымянялiся аддзелачныя матэрыялы i абсталяванне ў асноўным беларускай вытворчасцi.

Кiраўнiк дзяржавы агледзеў гандлёвыя павiльёны, пабываў у фiрменных магазiнах вядомых беларускiх вытворцаў, у тым лiку «Белiты», «Галантэi», «Элемы», шклозавода «Нёман», Мiнскага завода пенiстых вiн, кампанii «Серж», а таксама ў аддзяленнi ААБ «Беларусбанк». Прэзiдэнт даў высокую ацэнку новаму сталiчнаму грамадска-гандлёваму цэнтру.

Як быў праiнфармаваны Прэзiдэнт, апошнiм часам аб’ёмы продажу прадукцыi «Нёмана», якi яшчэ нядаўна знаходзiўся ў крызiснай сiтуацыi, значна павялiчылiся.

Аляксандр Лукашэнка пазiтыўна ацанiў намеры кампанii «Серж» па пашырэнню вытворчасцi. Не выключана, што гэтаму вытворцу можа быць перададзена адно з беларускiх прадпрыемстваў. Як адзначыў Прэзiдэнт, «калi будзе канкрэтная прапанова — мы яе вывучым». Пры гэтым беларускi лiдар падкрэслiў, што з боку чыноўнiкаў у гэтым пытаннi нiякай валакiты быць не павiнна.

Аляксандр Лукашэнка паразмаўляў з гандлёвым персаналам i наведвальнiкамi гандлёвага цэнтра «Сталiца».

Кiраўнiк дзяржавы павiншаваў мiнчан i гасцей сталiцы з надыходзячым Новым годам i пажадаў iм шчасця, здароўя i поспехаў.

Прэс-служба Прэзiдэнта Рэспублiкi Беларусь.