Правiнцыйныя рабы

Источник материала:

Гандаль людзьмi

Як адзначыла менеджар праграм прадстаўнiцтва Мiжнароднай арганiзацыi па мiграцыi ў Беларусi Наталля Жак, паводле апошнiх даследаванняў менавiта жыхары правiнцыi ва ўзросце ад 18 да 24 гадоў уваходзяць у спiс патэнцыйных ахвяр гандляроў рабамi. Апошнiя, паводле слоў намеснiка начальнiка ўпраўлення па наркакантролю i процiдзеянню гандлю людзьмi МУС краiны Сяргея Колтуна, iстотна «перабудавалiся» i дзейнiчаюць ва ўмовах строгай канспiрацыi. Напрыклад, iмкнуцца дзейнiчаць праз шлюбныя агенцтвы, якiя выклiкаюць менш падазрэнняў, для атрымання злачынных даходаў выкрыстоўваюць мiжнародную банкаўскую сiстэму пераводаў. Аднак праваахоўныя органы Беларусi навучылiся разблытваць i такiя хiтрыя схемы. У 2006 годзе было перакрыта 111 каналаў вывазу нашых грамадзян у 17 краiн свету. Асноўнымi «спажыўцамi» беларускага «жывога тавару» з’яўляюцца Расiя, Польшча, Германiя, Лiтва, Турцыя, Лiван, Грэцыя. Не так даўно нашых суайчыннiц пад выглядам танцоўшчыц пачалi вывозiць у бардэлi Канады, Пакiстана, Сальвадора i Белiза.

Увогуле летась выяўлена 567 злачынстваў такога кшталту. Спынена дзейнасць адной злачыннай арганiзацыi i 10 арганiзаваных злачынных груп, якiя трымалi пад кантролем цi непасрэдна займалiся нелегальным «сэкс-бiзнэсам». Устаноўлена 1100 ахвяраў гандляроў людзьмi. Колькi нашых суайчыннiц насамрэч прымусова знаходзяцца ў «белым рабстве» i добраахвотна шчыруюць на панэлi, мiлiцыя дакладна не ведае.

Для Беларусi таксама набывае вастрыню i праблема працоўнай эксплуатацыi з вывазам за мяжу. За апошнiя два гады ахвярамi «чорнага» рабства сталi 350 нашых суайчыннiкаў. Летась было ўзбуджана 17 крымiнальных спраў па такiх фактах. Прычым Беларусь з пастаўшчыкоў бясплатнай рабсiлы сама становiцца краiнай прызначэння. За 2004—2006 гады на нашай тэрыторыi было зафiксавана 18 ахвяраў працоўнай эксплуатацыi, сярод якiх не толькi грамадзяне Беларусi, але i замежнiкi.