Права застаецца

Источник материала:

Кватэрнае пытанне

А. ЛАМАКА, г. Мiнск.

Як патлумачыў член праўлення грамадскага аб’яднання «Веды» В.В. Савiцкi, улiк па месцы работы (службы) грамадзян, якiя маюць патрэбу ў паляпшэннi жыллёвых умоў, вядзецца ў дзяржаўных органах, iншых арганiзацыях, якiя маюць у валоданнi, карыстаннi жылыя памяшканнi i (або) ажыццяўляюць жыллёвае будаўнiцтва альбо прымаюць у iм долевы ўдзел. Гэта прадугледжана пунктам 8 Палажэння аб парадку ўлiку грамадзян, якiя маюць патрэбу ў паляпшэннi жыллёвых умоў, прадастаўлення жылых памяшканняў дзяржаўнага жыллёвага фонду (зацверджана Указам Прэзiдэнта Рэспублiкi Беларусь ад 29 лiстапада 2005 года № 565, якi ўступiў у сiлу 8 красавiка 2006 года). На кватэрны ўлiк па месцы работы могуць брацца работнiкi (з членамi сваiх сем’яў), якiя знаходзяцца ў штаце адпаведнай арганiзацыi.

Неабходна адзначыць, што наяўнасць у арганiзацый жылых памяшканняў павiнна разглядацца ў шырокiм плане, гэта значыць не толькi калi ў арганiзацыi на балансе знаходзяцца жылыя дамы, але i ў выпадках, калi арганiзацыi, не маючы на сваiм балансе дамоў, маюць права распараджацца адпаведнымi жылымi памяшканнямi, засяляць iх. Напрыклад, у адпаведнасцi з пунктам 3 вышэйпамянёнага ўказа кiраўнiка краiны, дзяржаўныя органы, iншыя дзяржаўныя арганiзацыi маюць права паўторнага засялення вызваленых жылых памяшканняў, якiя раней прадастаўлялiся iх работнiкам у дамах, перададзеных гэтымi органамi i арганiзацыямi мясцовым выканаўчым i распарадчым органам, незалежна ад часу перадачы такiх памяшканняў.

Па дзеючаму жыллёваму заканадаўству вырашэнне пытанняў аб прыёме грамадзян на кватэрны ўлiк па месцы работы не звязваецца з працягласцю работы ў гэтай арганiзацыi i працягласцю пражывання ў дадзеным населеным пункце. Больш таго, працоўнае заканадаўства рэспублiкi не прадугледжвае залежнасць прыёму на работу ад наяўнасцi або адсутнасцi прапiскi ў населеным пункце, дзе знаходзiцца гэта арганiзацыя. Iснаваўшыя ж раней нормы артыкула 182 Кодэкса аб адмiнiстрацыйных правапарушэннях, па якiх кiраўнiк арганiзацыi мог быць аштрафаваны, у прыватнасцi, за прыём на работу iншагароднiх грамадзян, якiя не маюць прапiскi ў гэтым населеным пункце, прызнаны Канстытуцыйным Судом Рэспублiкi Беларусь не адпаведнымi Канстытуцыi Рэспублiкi Беларусь i не маючымi юрыдычнай сiлы з 14 красавiка 1999 года.

Што датычыцца арганiзацый, якiя на законных падставах ажыццяўлялi вядзенне кватэрнага ўлiку па месцы работы да ўступлення ў сiлу Указа № 565, а зараз страцiлi гэта права, то ўсе работнiкi такiх арганiзацый (прынятыя на ўлiк да змянення заканадаўства) павiнны мець магчымасць рэалiзаваць ва ўстаноўленым парадку сваё права на паляпшэнне жыллёвых умоў.