Думай, калi бярэш у рукi запалкi

Источник материала:

З уступленнем у дзеянне з пачатку сакавiка Кодэкса аб адмiнiстрацыйных правапарушэннях, парушэнне правiлаў пажарнай бяспекi, якiя сталi прычынай знiшчэння цi пашкоджання лесу або тарфянiкаў, цягне накладанне штрафу ў памеры ад 25 да 50 базавых велiчынь. Правядзенне выпальванняў караецца штрафам ад 10 да 40 базавых велiчынь, а распальванне вогнiшчаў у забароненых месцах — папярэджаннем або штрафам у памеры да 12 базавых велiчынь.

Трапiў у лядовы палон

Выратавальнiкам-пажарным днямi давялося даставаць з пажарнага вадаёма жыхара Узды.

Паводле слоў iнспектара iнспекцыi дзяржаўнага пажарнага нагляду Уздзенскага раёна Аляксея Рака, выклiк паступiў у 19.45 ад аператара АЗС-23. Дыспетчар паведамiў аб тым, што на тэрыторыi станцыi ў пажарны вадаём трапiў чалавек, якi, правалiўшыся пад лёд, не можа выкараскацца. Да месца здарэння прыбыло аварыйна-выратавальнае падраздзяленне. З дапамогай выратавальнай вяроўкi спецыялiсты вызвалiлi мужчыну з лядовага палону. Высветлiлася, што 25-гадовы жыхар горада вырашыў скарацiць свой шлях дадому i ступiў на нетрывалы веснавы лёд.

Цана жыцця — цыгарэта...

Двое беспрацоўных братоў згарэлi ў вёсцы Паложына Бярэзiнскага раёна.

55- i 60-гадовы мужчыны жылi за кошт звалкi, што знаходзiлася побач з населеным пунктам: збiралi бутэлькi, кардон, металалом. Калi ў 7 гадзiн ранiцы мясцовыя жыхары, якiя iшлi на працу, заўважылi дым, што iшоў з жытла братоў, то выклiкалi выратавальнiкаў-пажарных. Падраздзяленнi МНС знайшлi загiнулых гаспадароў у жылым пакоi. Адзiн з ложкаў, дзе начаваў малодшы брат, выгараў цалкам, старэйшага знайшлi на канапе побач... Прычынай пажару, вiдавочна, стала незатушаная цыгарэта. Паводле iнфармацыi Мiнскага абласнога ўпраўлення МНС, у гэты ж дзень, як мяркуецца, па той жа прычыне загiнуў яшчэ адзiн чалавек. У вёсцы Пацiчава Смалявiцкага раёна ахвярай стаў таксама часова беспрацоўны.