Хрыстос уваскрос! Сапраўды ўваскрос!

Источник материала:

Вiншуем Вас са святам Уваскрасення Хрыстовага i разам з усiмi вамi прамаўляем радаснае пасхальнае вiтанне:

Хрыстос уваскрос! Сапраўды ўваскрос!

Свята ўваскрасення Хрыстовага — самае радаснае i ўрачыстае. У гэты дзень, як нi ў якi другi, сэрцы Божых дзяцей напаўняюцца святлом, надзеяй, радасцю i мiрам. Бо ўваскрасенне Хрыста — самая важная iсцiна Евангелля, што запэўнiвае кожнага вернiка ў перамозе Iсуса Хрыста над грахом, пеклам i смерцю:

«Ведаючы, што Той, Хто ўваскрасiў Госпада Iсуса, уваскрэсiць праз Iсуса i нас i паставiць перад Сабою з вамi» (2 Кар. 4:14).

З кожным iмгненнем нашага жыцця мы наблiжаемся да сваёй зямной мяжы. Але сягоння наш Творца напамiнае нам, што аднойчы Ён задзейнiчае сiлу ўваскрасення Хрыста, каб вярнуць да жыцця сваiх выбраных дзяцей. Мы ўваскрэснем, каб ужо нiколi не памiраць, каб жыць у Царстве Хрыста, дзе не будзе хвароб, смерцi, несправядлiвасцi, варожасцi.

Але ўваскрасенне Iсуса Хрыста мае адносiны не толькi да нашага будучага. Сiла ўваскрасення Хрыста аднойчы праявiлася ў жыццi кожнага веруючага ў мiнулым. Бо мы ўсе былi мёртвымi для Бога па прычыне нашых грахоў i злачынстваў. Але Бог з’явiў да нас Сваю лiтасць i любоў. Ён вярнуў нас да жыцця, уваскрасiў нас падобна таму, як Ён вярнуў да жыцця нашага Госпада Iсуса Хрыста.

Уваскрасенне Iсуса Хрыста мае адносiны не толькi да нашага мiнулага i будучага: сiла Яго ўваскрасення праяўляецца кожны дзень нашага зямнога жыцця ў цяперашнi час. Сiла ўваскрасення Iсуса Хрыста дапамагае нам змагацца са спакусамi, робiць нас здольнымi любiць ворагаў, радавацца сярод жыццёвых няўдач, дапамагае захоўваць супакой i мiр тады, калi нам пагражае небяспека, даруе мудрасць быць паблажлiвымi i цярплiвымi да людзей, клапацiцца пра блiжнiх, быць вернымi свайму доўгу i абяцанням.

Праславiм Бога за сiлу ўваскрасення Хрыстовага, якой Ён дзейнiчаў, дзейнiчае i будзе дзейнiчаць у нас магутна.

У гэты дзень свята Пасхi, разам з вiншаваннем, заклiкаем усiх хрысцiян i ўсiх суграмадзян да веры i да абноўленага жыцця ў Iсусе Хрысце. Немагчыма расчаравацца ў Iсусе Хрысце. Спадзявайцеся на Яго дапамогу i сiлу, звяртайцеся да Яго з усiмi праблемамi. Даверце Хрысту кiраўнiцтва Вашым жыццём, i Ён напоўнiць жыццё вашага дома i нашай краiны Сваiм вечным святлом. Няхай будзе ў кожнага з вас цудоўнае свята Уваскрасення Хрыстовага, ззянне якога не пагасне, i радасць якога не пройдзе!

ХРЫСТОС УВАСКРОС! САПРАЎДЫ ЎВАСКРОС!

Епiскап цэркваў Саюза евангельскiх хрысцiян баптыстаў у Рэспублiцы Беларусь

Мiкалай СIНКАВЕЦ.