Галоўны рэдактар газеты "Звязда" папрасiўся ў адстаўку

Источник материала:

У журналiсцкiм коле гэтая навiна стала амаль сенсацыяй. Уладзiмiр НАРКЕВIЧ з 1988 года кiруе адзiнай беларускамоўнай штодзённай дзяржаўнай грамадска-палiтычнай газетай “Звязда”. Неаднойчы за гэты час народная пагалоска здымала яго з пасады, але Наркевiч нязменна заставаўся рэдактарам “Звязды”.

Ён маўклiва праглынаў крытыку, якая сыпалася ў адрас рэдакцыi з афіцыйных структур і вуснаў калег, асаблiва з недзяржаўных выданняў, але радыкальных крокаў не прадпрымаў. Газета гадамi не мянялася па змесце, друкавала памяркоўныя матэрыялы, абыходзячы бокам любыя, нават нязначныя скандалы. Яе тыраж, нягледзячы на дзяржаўную падтрымку, нязменна быў невысокiм.

I вось нечакана для ўсiх Уладзiмiр Наркевiч напiсаў заяву аб звальненнi на iмя мiнiстра iнфармацыi Уладзiмiра Русакевiча. Напрыканцы сакавiка заяву разглядала калегiя мiнiстэрства. Зварот галоўнага рэдактара “Звязды” не задаволiлi, “узялi пад увагу”. Сам Наркевiч зараз у адпачынку. Сваё рашэнне ён не каменцiруе, заўважае толькi, што на такi крок прыйшлося пайсцi па стане здароўя.

Калектыў “Звязды” навiну аб рашэннi рэдактара звольнiцца ўспрыняў трывожна. Супрацоўнiкi перажываюць i за стан здароўя свайго кiраўнiка, i за лёс выдання. “Уладзiмiр Бранiслававiч — добры чалавек, — дзялiлiся сваiмi ўражаннямi некаторыя журналiсты ”Звязды". — Шкада, калi ён сыдзе…"

Мяркуючы па ўсiм, лёс Уладзiмiра Наркевiча высветлiц - ца ў блiжэйшы час. 24 красавiка — апошнi дзень ягонага адпачынку.

Вольга ГРЫНЯВIЦКАЯ