Больш сродкаў на лячэнне
Дзмiтрый АЛЬФЕР
На медыцынскае абслугоўванне i лячэнне кожнага жыхара Мiншчыны сёлета ў бюджэт вобласцi закладзена 311 тысяч 115 рублёў. У параўнаннi з леташнiм паказчыкам сума павялiчылася больш чым на 20 працэнтаў. Новыя нарматывы змешчаны ў праграме развiцця аховы здароўя на 2007—2010 гады, якая была прынята да выканання i дэпутатамi Мiнскага абласнога Савета.
Як расказаў карэспандэнту «Звязды» начальнiк упраўлення аховы здароўя Мiнаблвыканкама Iван ЛIПНIЦКI, вялiкая ўвага надаецца ў гэтай праграме вырашэнню актуальных праблем — дэмаграфiчнай бяспецы i прафiлактыцы захворванняў. — Хваробу лягчэй прадухiлiць, чым потым аказваць медыцынскую дапамогу. Недастаткова змагацца толькi з ужываннем алкаголю i нiкацiну. Ахова здароўя людзей пачынаецца з правiльнай арганiзацыi харчавання ў школах, дзiцячых садках i на прадпрыемствах, здароўе будучага пакалення залежыць i ад таго, у якiх умовах жыве цяжарная жанчына — адзначыў Iван Лiпнiцкi. — Вось толькi некалькi напрамкаў, якiя працягне ўдасканальваць медыцына вобласцi. Яна будзе развiвацца не толькi, напрыклад, у галiне кардыяхiрургii. Захаванне здароўя на 90 працэнтаў залежыць ад паводзiнаў, ладу жыцця людзей, таму прафiлактыка хвароб з’яўляецца зараз адной з нашых галоўных мэтаў. Разам з тым летась у вобласцi было набыта шмат медыцынскага абсталявання i тэхнiкi, у тым лiку 100 машын «хуткай дапамогi», перасоўныя рэнтген-апараты, стаматалагiчныя ўстаноўкi, апараты штучнай вентыляцыi лёгкiх. — Мы i надалей будзем працаваць над паляпшэннем стану здароўя насельнiцтва. Трэба панiзiць колькасць захворванняў, актуальнае i пытанне памяншэння ўзроўню смяротнасцi сярод нованароджаных. Будзе рэалiзоўвацца праграма па ўсеагульнай дыспансэрызацыi, што павiнна прывесцi да выпраўлення дэмаграфiчнай сiтуацыi ў вобласцi. Ну i, канешне ж, матэрыяльна-тэхнiчная база медыцынскiх устаноў будзе абнаўляцца i мадэрнiзавацца, — паведамiў Iван Лiпнiцкi.
Чтобы разместить новость на сайте или в блоге скопируйте код:
На вашем ресурсе это будет выглядеть так
На медыцынскае абслугоўванне i лячэнне кожнага жыхара Мiншчыны сёлета ў бюджэт вобласцi закладзена 311 тысяч 115 рублёў
|
|