Штрафуе суд. Але не кiраўнiк

Источник материала:

(Заканчэнне. Пачатак у нумарах за 20 і 21 чэрвеня).

— Хутка дзiцяцi споўнiцца 2 гады, пасля чаго маю намер вярнуцца на работу. Цi павiнны мяне прыняць з улiкам таго, што на маiм месцы зараз працуе iншы чалавек?

Галiна Рыгораўна

— На час водпуску па догляду дзiцяцi ва ўзросце да 3 гадоў за жанчынай захоўваецца яе ранейшае працоўнае месца. I ў выпадку, калi такая жанчына вырашае перапынiць водпуск па догляду, гэта можна зрабiць у любы дзень — дастаткова толькi папярэдне падаць пiсьмовую заяву. Таму калi наймальнiк прымае на месца «дэкрэтнiцы» iншага чалавека, то з iм заключаецца часовы працоўны дагавор, што ў сваю чаргу павiнен скасоўвацца за дзень да выхаду асноўнага работнiка — жанчыны, якая знаходзiлася ў водпуску па догляду дзiцяцi ва ўзросце да 3 гадоў.

— Наколькi я ведаю, у сувязi з пераводам на кантракт аклад можа павышацца напалову. Чаму ж у такiм разе ў мяне гэта павышэнне аказалася такiм маленькiм — усяго 1 працэнт?

Святлана Барысаўна Малахоўская

— Сапраўды, згодна з Дэкрэтам № 29 ад 26 лiпеня 1999 года, пры пераводзе работнiка на кантракт яму павiнны прадастаўляцца наступныя стымулы: дадатковы водпуск працягласцю да 5 каляндарных дзён i павышэнне тарыфнай стаўкi да 50 працэнтаў. Разам з тым трэба заўважыць, што гэта — максiмальная «планка». Што да «планкi» мiнiмальнай, то яе па сутнасцi няма. Таму, з улiкам фiнансавых магчымасцяў канкрэтнай арганiзацыi, аклад можа павялiчвацца i на 1, i нават на 0,1 працэнта. I гэта не з’яўляецца парушэннем Дэкрэта.

— Колькi гадзiн дазваляецца гандляваць на рынку пры высокай цi наадварот — нiзкай тэмпературы паветра?

Iрына Мiкалаеўна, г. Магiлёў

— Працягласць знаходжання на працоўных месцах на адкрытым паветры па-за вытворчымi памяшканнямi санiтарнымi правiламi i нормамi не рэгулюецца. Што да месцаў у вытворчых памяшканнях, то тут з мэтай абароны ад перагравання цi пераахалоджвання час работы абмежаваны велiчынямi, вызначанымi СанПiНам 9-80 РБ 98. Да слова, у дадзеным выпадку бяруцца пад увагу такiя паказчыкi мiкраклiмату, як тэмпература паветра, тэмпература паверхняў, адносная вiльготнасць i хуткасць руху паветра. Прычым павiнен рабiцца замер гэтых паказчыкаў — у днi з адхiленнямi прынамсi на 5 градусаў ад сярэдняй тэмпературы найбольш халоднага цi найбольш спякотнага месяца года.

— Адкажыце, калi ласка, цi мае права кiраўнiк прыватнай фiрмы накладваць штрафы за спазненне на работу?

Аксана Пятроўна

— Адназначна — не. I пры гэтым незалежна ад формы ўласнасцi арганiзацыi. Сапраўды, спазненне на работу з’яўляецца дысцыплiнарным праступкам, за якi наймальнiк можа ўжыць меры дысцыплiнарнага спагнання. I ў тым лiку — цалкам або часткова пазбавiць прэмii. Аднак штраф можа накладвацца згодна з Кодэксам аб адмiнiстрацыйных правапарушэннях цi Крымiнальным кодэксам толькi ўпаўнаважанымi асобамi цi судамi. I нi ў якiм разе не кiраўнiком.

— Працую ў прыватнай фiрме, а пытаннi адразу два. Па-першае, якiя вызначаны памеры сутачных пры паездках у Расiю? I па-другое: цi могуць камандзiровачныя выплачвацца праз два—тры месяцы пасля службовай паездкi?

Iгар, г. Бабруйск

— Так званыя «сутачныя» пры службовых паездках у Расiйскую Федэрацыю вызначаны ў 20, а пры паездках канкрэтна ў Маскву i Санкт-Пецярбург — у 25 долараў ЗША. Пры гэтым пры накiраваннi работнiка за мяжу наймальнiк абавязаны выдаць аванс у замежнай валюце i кампенсаваць выдаткi па праезду на месца прызначэння i назад, па пражыванню (сутачныя), па найму жылога памяшкання, а таксама iншыя выдаткi, што ўтварылiся са згоды цi з ведама наймальнiка.

Прычым недзяржаўныя арганiзацыi могуць рабiць выплату авансу на кампенсацыю сутачных выдаткаў i выдаткаў па найму жылля i па iншых, самастойна вызначаных нормах. Разам з тым падкрэслiм: гэтыя нормы не могуць быць нiжэй, чым у арганiзацый, што фiнансуюцца з бюджэту i карыстаюцца дзяржаўнымi датацыямi.