На рынку самыя танныя памiдоры — украiнскiя

Источник материала:

Што да канкрэтных цэн i асартыменту, дык учора да поўдня яны былi наступнымi. Кiдаўся ў вочы вялiкi выбар памiдораў, але засмучала, што самымi таннымi былi пакуль украiнскiя — па 3—3,2 тысячы рублёў за кiлаграм. Беларускiя прадавалi амаль па адной цане з iспанскiмi — пераважна 3,7—3,8 тысячы рублёў (цана даходзiла да 4 тысяч). Айчынныя агуркi ад розных вытворцаў iшлi па 1,6—1,8 тысячы рублёў за кiлаграм. Морква новага ўраджаю — па 2,3 тысячы рублёў. Аднолькавая цана на ўсiм рынку назiралася на беларускую белакачанную капусту — 2,3 тысячы рублёў за кiлаграм. «Родны» салодкi перац «стартаваў» з 3 тысяч рублёў за кiлаграм (чым даражэй, тым лепшай была якасць). Iмпартная цыбуля-рэпка (прыгажосць на выгляд — адна ў адну) прапаноўвалася па 3—3,2 тысячы рублёў. Крыху здзiвiлi цэны на баклажаны — усяго тыя ж 3 тысячы за кiлаграм. Клубнiцы ўжо сапраўды адыходзяць, прынамсi, вялiкага выбару не было, прычым, ягада пераважна прадавалася не на вагу, а вядзерцамi цi вёдрамi. Народ ужо, вiдаць, ад’еўся, бо асаблiва клубнiцы не набывалi. Затое паболела лiтаральна за некалькi дзён чарнiц, праўда, цэны пакуль не надта малыя, таму прадаюць ягады пераважна слоiкамi. Скажам, за лiтровы ўчора гандляры прасiлi 5—5,5 тысячы рублёў. З’явiлiся i першыя лясныя сунiцы, праўда, кошт... За той жа лiтровы слоiк прасiлi па 10 тысяч рублёў. У чаргу пакупнiкi, канешне, за лясной ягадай не выстройвалiся, аднак актыўна падыходзiлi, прыцэньвалiся. Самай распаўсюджанай цаной на чарэшню была лiчба 6,5 тысячы рублёў за кiлаграм, радзей можна было ўбачыць на цэннiку лiчбу 6,8 тысячы, а максiмальны кошт на чарэшню даходзiў да 12 тысяч рублёў. Персiкi каштавалi ўчора менш за абрыкосы. Першыя iшлi па «чырвонай цане» 4,5—5,5 тысячы рублёў, за абрыкосы ж прасiлi не менш як 7 тысяч рублёў за кiлаграм.