Аб хваробах агуркоў

Источник материала:

Белая гнiль развiваецца пры нiзкай тэмпературы. Пры гэтым захворвае аснова сцябла, лiсце павiсае, i раслiна гiне.

Аслабленае лiсце хварэе на фузарыёз цi каранёвую гнiль. Каранi бурэюць, робяцца нiбы мачалка. Бывае гэта ад залiшняй падкормкi каравяком. У такiх выпадках трэба палiць пад каранi растворам марганцоўкi (1 г на вядро вады).

Для барацьбы з гэтымi i iншымi захворваннямi можна выкарыстоўваць хлорвокiс медзi, палiхом (40 г на вядро вады), апрацаваць пры паяўленнi першых прыкмет захворвання i паўтарыць праз 7—10 дзён. Добрыя вынiкi дае апрацоўка растворам: 20 г суперфасфату плюс 20 г любых калiйных угнаенняў, плюс 2 г марганцоўкi, плюс 4 г меднага купарвасу на вядро вады. Супраць мучнiстай расы можна ў мэтах прафiлактыкi апрацаваць раслiны перад паяўленнем завязяў такiм растворам: 50 г калоiднай серы i 5 г меднага купарвасу на вядро вады цi настоем часнаку (200—300 г на 10 л вады). Пры з’яўленнi гнiлi на сцёблах — пасыпаць гэтая месцы парашком бярозавага вугалю. Пасля апрацоўкi палiў спыняюць на тыдзень.

ЧЫМ ЧАСЦЕЙ, ТЫМ ЛЕПШ

Многiя агароднiкi скардзяцца, што раслiны агуркоў вельмi добра цвiтуць, але даюць мала пладоў. Каб павысiць ураджайнасць агуркоў, трэба прышчыкнуць цэнтральную плець, тады на бакавых плецях будзе больш жаночых кветак, якiя i дадуць шчодры ўраджай.

Кожны агароднiк ведае, што агуркi апыляюць пчолы. Каб пчолак падключыць да гэтай работы, трэба каля кожнай градкi высаджваць раслiны-меданосы. Падыходзiць для гэтай ролi фiзалiс агародны — ён цвiце ўвесь час да замаразкаў, яго вельмi любяць пчолы. Яшчэ ля градкi з агуркамi можна размясцiць клумбу, напрыклад, з кветкамi алiсiума, водар мёду ад якiх прыцягне ўвагу пчол.

Трэба памятаць: чым часцей збiраеш плады агуркоў, тым вышэй будзе ўраджай. Рабiць гэта трэба штодзённа, у другой палове дня, таму што пераважна ў гэты час накоплiваецца найменшая колькасць нiтратаў.

Агуркi можна захаваць свежымi некалькi дзён, калi iх трымаць на тры чвэрцi ў вадзе пладаножкамi ўнiз i кожны дзень мяняць ваду.