Нелегалы-рыбаловы

Источник материала:

ЗАКАЗНIКI — НА АГЛЕДЗIНЫ

Iнвентарызацыю заказнiкаў на тэрыторыi Брэсцкай вобласцi праводзяць разам вучоныя Палескага аграрна-экалагiчнага iнстытута i Брэсцкага дзяржунiверсiтэта iмя Пушкiна. Усяго на Брэстчыне каля трох дзесяткаў заказнiкаў i запаведных зон. Да канца года навукоўцы павiнны выявiць як пазiтыўныя, так i негатыўныя бакi развiцця гэтых тэрыторый.

Яна СВЕТАВА.

ЗАТРЫМАНЫ «КIШЭННIКI»

Ранiцай у салоне аўтобуса, што курсiруе ў Вiцебску па маршруту № 12, на адным з цэнтральных маршрутаў мiлiцыянеры затрымалi пару кiшэннiкаў. Iмi аказалiся мясцовыя жыхары, беспрацоўныя: раней судзiмая жанчына 1973 года нараджэння i яе 51-гадовы «напарнiк». Яны спрабавалi скрасцi кашалёк з сумачкi пенсiянеркi, дзе знаходзiлiся ўсяго толькi 23 тысячы беларускiх рублёў.

ЗНАЙШЛI ГРАНАТЫ...

Пры правядзеннi вышуковых работ у лясным масiве ля вёскi Асiнторф Дубровенскага раёна былi знойдзены 14 гранат «Ф-1», граната «РГ-42», а таксама 2 мiнамётныя мiны калiбру 120 мiлiметраў часоў Вялiкай Айчыннай вайны.

ВАРТАЎНIК ЗГАРЭЎ

Ноччу ў будаўнiчым вагончыку ля будоўлi жывёлагадоўчага комплексу гаспадаркi «Туркоўскi» ў вёсцы Супорнiца Мiёрскага раёна адбыўся пажар. Згарэў вагончык агульнай плошчай 12 квадратных метраў. Як паведамiлi «Звяздзе» ў прэс-цэнтры УУС Вiцебскага аблвыканкама, на месцы пажару быў знойдзены труп вартаўнiка ПМК-55 1951 года нараджэння.

Аляксандр ПУКШАНСКI.

ЧЭКIСЦКIЯ IНВЕСТЫЦЫI

Беларускiя чэкiсты не толькi стаяць на варце дзяржаўнай бяспекi, але i аказваюць дапамогу айчынным вытворцам. Паводле звестак прэс-службы ўпраўлення КДБ па Мiнску i сталiчнай вобласцi, за 6 месяцаў гэтага года чэкiсты прыцягнулi iнвестыцыi на агульную суму 1,47 мiльярда рублёў. Апроч таго супрацоўнiкi УКДБ вярнулi ў даход дзяржавы 2,05 мiльярда рублёў i прадухiлiлi ўрон у памеры 2,11 мiльярда рублёў.

Мiкола ДЗЯБЁЛА.