Гродзенскія камунальшчыкі аб’явілі вайну гаспадарам сатэлітарных антэнаў

Источник материала:

Да актывістаў гродзенскага руху “За Свабоду” патрапіў дакумент: камунальшчыкі прадпісваюць тэрмінова прыбраць спадарожнікавыя антэны. Прадпісанні імянныя, то бок кожны гаспадар антэны атрымаў гэты дакумент па пошце.

Пакуль невядома, ці выйшлі гэткія прадпісанні ў астатніх раёнах Гродна, але ЖЭС-6 паведаміў пра свае патрабаванні кожнаму ўладальніку талеркі на праспекце Касманаўтаў.

У выпадку невыканання прадпісання ЖЭС-6 пагражае адміністратыўнай адказнасцю - штрафамі. Пакуль жа ўладальнікаў сатэлітарных антэнаў запрашаюць на размову ў ЖЭС-6.

Згодна Адміністратыўнаму кодэксу па артыкуле 21.13 “Парушэнне архітэктурнага рашэння фасада будынка або збудавання” самавольныя пераабсталяванне, перафарбоўванне або іншая змена балконаў, лоджый і іншых архітэктурных і канструктыўных элементаў фасадаў жылых дамоў, іншых будынкаў, усталёўка на фасадах, балконах, лоджыях, стрэхах спадарожнікавых і іншых антэнаў, а таксама непрыняцце мер па падтрыманні ў належным стане знешняга выгляду жылых дамоў, іншых будынкаў, агароджаў цягнуць за сабой накладанне штрафу ў памеры ад двух да пятнаццаці базавых велічынь.

Лявон ЖДАНОВІЧ