Аляксей Хлястоў: Мы не павінны забывацца на родную мову

Источник материала:

Спяваць па-беларуску становіцца сапраўдны модна. Пацвердзіў гэта адзін з самых паспяховых айчынных поп-спевакоў Аляксей Хлястоў. Якраз 1 лютага ён прэзентаваў інтэрнэт-сінгл, у які ўвайшла новая кампазіцыя ў яго выкананні пад назвай “Погляд дзявочы”. У дзень яе выхаду выканаўца пагадзіўся прэзентаваць гэты твор на Радыё Рацыя, а таксама распавёў пра сваё стаўленне да сённяшнага музычнага фармату і пра планы запісаць адну з кампазіцый гурта “Нейра дзюбель”.

"Я жыву ў сваёй краіне, якая завецца Беларусь. Раней не сустракалася песня па-беларуску, якая б мне падыйшла. І вось нарэшце яна з’явілася", - кажа пра новы сінгл Аляксей Хлястоў.

Аўтар песні “Погляд дзявочы” Уладзімір Кур’ян пагадзіўся аддаць на бясплатнай аснове свой твор Аляксею Хлястову. Цікава, што раней яе выконваў Якаў Навуменка.

Цяпер беларускамоўных песень у эфіры беларускіх FM-станцый зусім няшмат, няглядзячы на існуючую квоту ў 75 працэнтаў беларускай музыкі. Але музычныя рэдактары аддаюць перавагу іншым творам, бо лічаць саму мову выканання - нефарматнай. Згаджаецца з гэтым і Аляксей Хлястоў, але кажа, што сітуацыя ў гэтым кірунку пакрысе выпраўляецца.

- Зараз з’яўляюцца праграмы пра беларускамоўную музыку шмат на якіх радыёстанцыях. І я думаю, што гэта першы крок да папулярызацыі нашай культуры. Мы не павінны забывацца на сваю родную мову, спяваць на ёй і размаўляць.

У інтэрв’ю Рацыі Аляксей Хлястоў пацвердзіў свой намер удзельнічаць у трыб’юце беларускай рок-зоркі - гурта “Нейра дзюбель”. Зараз, як жартуе спявак, засядае невялічкі кансіліум тых людзей, з якімі ён працуе - каб абраць твор “дзюбелей” для Хлястова. Самому ж Аляксею надта даспадобы песня Аляксандра Куллінковіча “Пераехала камбайнам”.

- Песня прыкольная і бесшабашная.

Кавер “Нейра дзюбеля” ў выкананні Аляксея Хлястова мы пачуем у бліжэйшы час, а пакуль жа спявак прэзентуе свой першы беларускамоўны твор “Погляд дзявочы”.

Сяргей БУДКІН