Махляр — спецыяліст па анкетных даных

Источник материала:

Як нас дураць

У Мiнску на тэрыторыi чыгуначнага вакзала праваахоўнiкамi быў затрыманы махляр, якому за паўгадзiны ўдалося завалодаць 5 кашалькамi работнiкаў бiблiятэкi.

Паводле звестак аддзялення iнфармацыi i грамадскiх сувязяў ГУУС Мiнгарвыканкама, пакiнуў аб сабе нядобрую памяць зламыснiк у бiблiятэцы Беларускага дзяржаўнага ўнiверсiтэта культуры i мастацтва на вулiцы Рабкораўскай. А завiтаў ён туды пад выглядам нiбыта новага намеснiка рэктара па мастацкай частцы. Прынамсi, менавiта так ён адрэкамендаваўся работнiкам бiблiятэкi. Iнiцыятыўны "намеснiк" адразу ж прыступiў да асноўнай мэты свайго прыходу: пачаў раздаваць супрацоўнiкам даручэннi па абмеру мэблi ў сувязi з рамонтам. А па ходу справы ўзгадваў пра кiраўнiкоў навучальнай установы, у прыватнасцi, пра iх анкетныя даныя. Гэтага хапiла, каб людзi страцiлi пiльнасць i асаблiва не сачылi за наваяўленым "забеспячэнцам". Той жа толькi гэтага i чакаў: пакруцiўшыся сярод сталоў, ён хуценька знiк, а разам з iм — кашалькi i мабiльнiк.

Затрымалi злачынцу па прыметах праз 20 хвiлiн з набiтымi банкаўскiмi карткамi кiшэнямi. У Кастрычнiцкiм РУУС Мiнска, куды яго даставiлi, малады чалавек асаблiва не ўпарцiўся: ён не толькi не адмаўляў факта крадзяжу ў бiблiятэцы, але распавёў праваахоўнiкам пра шэраг iншых аналагiчных злачынстваў.

"Засвяцiўся" ж прайдзiсвет не толькi ў Мiнску, але таксама паспеў напракудзiць у Брэсцкай, Магiлёўскай i Гродзенскай абласцях, а таксама на тэрыторыi Расii, у прыватнасцi, у Бранску. Прычым усюды дзейнiчаў па адным i тым жа сцэнарыi: спачатку збiраў iнфармацыю аб установе, на якую паклаў вока, а пасля падчас абедзеннага перапынку нахабна туды заходзiў. Падманваючы пацярпелых (як у папярэднiм выпадку), ён i разжываўся. Дарэчы, як устаноўлена, частка злачынстваў, пра якiя распавёў махляр, пацвердзiлася. Цяпер супрацоўнiкi мiлiцыi спрабуюць устанавiць асобу затрыманага, якi пакуль хавае свае анкетныя даныя ад следства.

Iгар ГРЫШЫН.