Баршчэўскі і Пазьняк сустрэліся ў Варшаве

Источник материала:

З нагоды публікацыі ў Польшчы дзьвюх анталёгіяў беларускай паэзіі ў Варшаве сустрэліся старшыня Партыі БНФ Лявон Баршчэўскі і старшыня Кансэрватыўна‑хрысьціянскай Партыі БНФ Зянон Пазьняк.

Лявон Баршчэўскі, які актыўна спрычыніўся да падрыхтоўкі абедзьвюх кніг, быў адным зь вядучых вечарыны, што адбывалася ў Польскім ПЭН‑клюбе.

Зянон Пазьняк чытаў свае вершы, перакладзеныя на польскую мову вядомым перакладнікам Адамам Паморскім.

Пасьля вечарыны палітыкі абмяняліся думкамі наконт актуальнай сытуацыі ў Беларусі. Зянон Пазьняк пераконваў, што найлепшае рэагаваньне на сёньняшнія дзеяньні ўладаў у Беларусі — гэта байкот маючых адбыцца выбараў у "Палату прадстаўнікоў". Лявон Баршчэўскі прывёў аргумэнты на карысьць абмежаванага ўдзелу партыяў у выбарах.

Палітыкі абмеркавалі таксама пытаньні супольнай публікацыі мэмуараў сяброў колішняй апазыцыі БНФ ў Вярхоўным Савеце XII скліканьня.

Наступная размова Лявона Баршчэўскага і Зянона Пазьняка можа адбыцца ўжо ў першай дэкадзе ліпеня гэтага году. 

Еўрарадыё пацікавілася ў Лявона Баршэўскага, якія ўражанні ён мае ад варшаўскай сустрэчы? Вось што кажа старшыня Партыі БНФ:

"Доўгі побыт спадара Пазьняка за мяжой паўплываў на яго станоўча. Вядома, дзесьці яму не хапае праўдзівай інфармацыі. Але ён разважае рацыянальна, разумна і ўвогуле мне прыемна з ім размаўляць заўсёды".

Што да чутак пра магчымае аб'яднанне дзвюх партый, дык Баршчэўскі кажа, што ёсць нямала магчымасцяў для супольнай дзейнасці. Аднак ён бачыць праблему толькі ў тым, што кіраўнікі КХП-БНФ у Беларусі маюць "нейкія асабістыя комплексы" і не хочуць супрацоўнічаць з Партыяй БНФ.