Гісторык заклікае збіраць грошы на помнік прэзідэнту БНР

Источник материала:

Гісторык і палітык Анатоль Сідарэвіч лічыць, што трэба распачаць акцыю збору грошай на пабудову помніка прэзідэнту Беларускай Народнай Рэспублікі (старшыні Рады БНР у выгнанні) Міколу Абрамчыку (1903 - 1970). Нагадаем, яго магілу, якая лічылася згубленай, днямі адшукалі ў Парыжы на могілках Pere-Lachaise актывісты ініцыятывы "Беларуская Нацыянальная Памяць".
На магільнай пліце не аказалася ні шыльды, ні надпісу, яе ўдалося ідэнтыфікаваць з дапамогай сведчанняў эмігрантаў, гісторыка Наталлі Гардзіенкі і архіўных ды фотаматэрыялаў са збораў беларускай бібліятэцы імя Ф.Скарыны ў Лондане.

Вось што мяркуе Анатоль Сідарэвіч наконт таго, што можа зрабіць незалежнае беларускае грамадства ў гэтай сітуацыі:

"Па рублю скінуцца, хто колькі можа, збярэм на помнік, трэба паставіць помнік Міколу Абрамчыку. Ён быў сцяганосцам ідэй незалежнай беларускай дзяржавы".

Сідарэвіч падкрэслівае, што могілкі Pere-Lachaise - знакамітыя, там пахаваныя камунары, вялікія дзеячы Францыі. Усталяванне помніка на магіле прэзідэнта Абрамчыка сведчыла б і пра павагу беларусаў да асобы гэтага дзеяча, і пра "культурнасць беларусаў", лічыць Анатоль Сідарэвіч.


На здымку: Мікола Абрамчык

 

Адкрылася выстава пра заснавальнікаў БНР

“Заснавальнікам БНР прысьвячаецца” - пад такім назовам сёньня ў Менску ў сядзібе партыі БНФ адчынілася мастацкая выстава, паведамляе Радыё Свабода. 

У экспазыцыі прадстаўленыя больш за трыццаць твораў беларускіх мастакоў з прыватнай калекцыі кіраўніка клюбу “Спадчына” Анатоля Белага. У ліку аўтараў твораў выставы - народны мастак Беларусі Ўладзімер Стальмашонак, вядомы беларускі графік Мікола Купава, старшыня Згуртаваньня беларусаў сьвету “Бацькаўшчына”, кіраўнік творчае суполкі “Пагоня” Алесь Марачкін і іншыя творцы.

Выстава прысьвечаная 90-годзьдзю БНР. І хоць дата 25 сакавіка ўжо мінулася, але, як сказаў Алесь Марачкін, увесь сёлетні год дэмакратычнай грамадзкасьцю краіны шануецца як год беларускае дзяржаўнасьці:

“Гэты год — год 90-годзьдзя БНР. Гэта год беларускае дзяржаўнасьці, як мы яе разумеем у найноўшай гісторыі. На жаль, гэтую дату афіцыйныя ўлады не прызналі. Мы пісалі лісты і ад “Бацькаўшчыны” да гарадзкіх уладаў, каб на будынку, у якім была ў 1918 годзе прынятая Другая Ўстаўная грамата, замацаваць шыльду і гэткім чынам правесьці мэмарыялізацыю гэтага месца. Улады нам у гэтым адмовілі, хаця мэмарыяльная дошка зробленая ўжо некалькі гадоў таму скульптарам Алесем Шатэрнікам і яна ў яго майстэрні так і захоўваецца”.

Первоисточник: